Chad Niam Behdeinkhlam

Soolangki LalooJune 18, 2020

I por iong ka da Jan kattu
Yei man Wei sniaw wa wan kyrsu
Khynnah, waheh, khynroo khyllood, manbru manpa
Waroh waroh wa ya khih sya.

Hei burom u Trekirot
Yei man iongka wa pynsarot.
Kam Niam rukom wa pynthiah pynchong
Sarin Pa sarin Kat Kam ki hukum adong.

Nadooh na Yung hadooh ha Raij
I khreh tayar walai chait chait
Ka kchuu ka Siang, u Kni u Pa
Kam Niam u pyndep dei montyrna.

Soo sngi Le Yaw, ya ka u pyndep I
Chirup Wei sur ka Bom ka Bhuri
Ha Biar ha ktieh u ya Chad deilang
Yei man Wei sniaw wa pyntympang.

Ish! Ha uni u snem kammon ma ai?
Dak Jingkylli wamih Kat Cha wa wan walai.
Daw ioh ma ai, u ya Chad ya mih Kam wajooh,
Ha khmat ka Yaw ka Syiem dei wa ioophein ioophooh?

Waroh waroh hei niawliar niawtang
Ya ka jubab wa yooluti wa yang.
Pisa lang-a I man Wei sniaw
Tiap tiap wa da Jan poi ki sngi ka tayaw

Kyntien pynkut heini u booh
A! Khon ka Niamtre yein hei Dem I ngooh.
Kutlad hei pyrkhat pyrdain to beh Cha jngai
Burom ka Niam iow bna ka pyrthai.
Yein dap chynrang kynthai wow pynkhroo
Yei  burom u Trekirot,
Na Yung ha Raij ha Dong dei wa Sarot.