Chad Sukkara: Ka Jingkyrmen jong ka Pyrem

Syllad | The Rising MeghalayaApril 17, 2022

Ka Pyrem ymtang ba ka dei ka jingkut jong ka tlang bad tyrkhong bad ba daitthah, hynrei ka dei ruh ka jingsdang kaba thymmai. Haka jingshisha ka Pyrem ka long kum ka snem thymmai hi ïa ki riewlum trai shnong kiba im da ka rep ka riang. Ka jingkylla jong ka aïom ka ktah ruh ïa ki briew ha kiba bun ki liang bad kumjuh ïaka jingim jong ki hi baroh kawei. Namar ba ka jingim jong ki ka tyllun sawdong jong ka rep ka riang, wat ki jinglehkmen ne ki jingpyndonburom jong ki shong katkum u jingthung uba kongsan uba ki rep.

Ka rukom jong ki Pnar bad ki War jong ka distrik Jaiñtia ka dei ban pyndonburom ïa ka jingwan jong kane ka aïom da ki sur bad da ka jingkmen. Naka bynta jong ki nongrep ka Pyrem ka dei ka por ban ai ka nguh ka dem ïa U Tre Kirod bad ka Bei Ramaw bad ban buh ka duwai ka phirat naka bynta ban ïoh ka jingïoh ot kaba dap pura. Na ka bynta ban pdiang ïa ka aïom bad ban duwai ban nguh ïa U Nongthaw bad ïa ka Bei Ramaw, ki Pnar ki pyndonburom da ka Chad sukara, ki Khasi da ka Shad Suk Mynsiem bad ki War Jaiñtia pat da ka Rong Kusi.

Kane ka taïew ba la lah bad ka taïew kaban sa wan ka dei ka taïew kaba ki Raij bad ki shnong ki pyndonburom bad lehkmen ïa ka jingwan jong ka Pyrem ha ki shnong kiba pher bapher kiba ki don. Ki Raij kum ka Mukhla, ka shnong Khliehtyrshi bad kiwei pat kila pyndep ïa ka Chad Sukra jong ki, katba ki raid kum ka Ialong kin sa pynlong ïa ka Chad Sukra bad ka Noh Sakyriat jong ki ha ka 25 tarik jong une u bnai.

Mynta ka sngi ka Seiñraij Shnong Sabahmuswang kala pynlong ïa ka Chad Sukkara ha ka madan shnong ha kaba u paid byllien ula wan ban ïashim bynta. Kane ka jinglehkmen ka dei ruh ka kabu ïa ki khun samla jong ka shnong ba kin pyni ïala ka rukom shad tynrai jong ki ha ki khor ki khriam kiba itynnad kiba ki phong. Ki jingshad tynrai kiba la pyninam mynta ka sngi ki long kum ka chad nongrep, ka chad rwai Chad pliang 12 ngut, chad pliang 4 ngut, chad pliang 2 ngut bad kiwei pat ki rukom shad tynrai kiba u mynbarim ula buh pateng. La ïoh ruh ïa ka chadpliang naka Seinraij Shnong Sabahmuswang. Ki khun samla kila pynpaw pyrthei ruh ïala ka sap ka phong da kaba rwai ha ryngkat ki jingtem da ki tiar tem tynrai kumba la pynmyllien uba rim.

Ha ka jinglehkmen Chad Sukara jong ka Seiñraij Shnong Sabahmuswang la ïoh ruh ïa ka jingkren na u Wailadmiki Shylla uba long MLA jong ka thain, u Brightstar Chyrmang MDC, u Puramon Kynjing Daloi ka elaka Jowai, u Helping Phawa uba mihkhmat ïa ka Raij Tuber, Rijan Kyndait Secretary Shnong, u Phawa, Telme Phawa, u Dr. H.H. Mohrmen u nongtreimon sngewbha bad kiwei kiwei. Ïa ka jingïalang la pynïaid da u Carlin Phawa uba long u President ka Seiñ Raij Shnong Sabahmuswang.  

Photo Credit: Leeno Shilla