Chem chitom ki pharæng wow yaleh pyrchah wa ki chipai u Kiang Nangbah: Dr. Kharlukhi

Syllad | The Rising MeghalayaDecember 30, 2023

Mano bad hangno la kem ia U Kiang Nangbah?

Ynne ka sngi ka Seiñraij Jowai, da kynmoo warom tympang ko ya ka lyngkhooh dap snem wa 161 wa yap u Woh Kiang Nangbah ha Myngkoi Pyrdi, Loompyrdi Iongpiah, Jowai heiwa u MP ka Rajya Sabha, u Dr. Wanweiroy Kharlukhi da man u kam u kongsan.

U Dolloi ka Elaka Jowai hawa e yei klam da kynmoo u ya ka kot sahkynmoo wa thoh u Dr. Kharlukhi ha u 1992 heiwa da thoh wa u Kiang Nangbah yieñ yaleh u hadien wa khang ki chipai pharæng wow pyndep ya ka lehniam thang ka riñ ya i metyap yong kiwa da khlaad ha Jowai.

Da ong u wa u Woh Kiang Nangbah wan u na ka manyung kawa duna hei yoh i laa wei na ka yalang bah wa man ha Madiah Kmai Blai hadien wa mih ki dak maya Blai deiwa ngam ha ka Wah Myntdu wow sai ya u dieñ wa em le chnat da bahkhlieh u wow yaleh pyrchah ya ki pharæng.

U Dr. Kharlukhi hawa e yei klam da ong u I’m i pyrtuid wei wa u Woh Kiang Nangbah da yap u ha u tylle pasi 161 snem nachwa wei ki kaam yong oo pynsah ki ya ka parom yong oo.

Da ong katkam ki kot wa yoh u wei na Bilat wa da pynmih ha u 1863 da khana ki wa chem chitom ki pharæng wow yakhun pyrchah wa ki chipai wa yah luti u Woh Kiang Nangbah heiwa 3 ngut ki sahep chipai ka pharæng yap ki ha Ri Jaiñtia.

Chongkun ka yachemlang ha ka 1st Kiang Nangbah Youth Conference

Chooh chooh da ong u wa katkam ka juk katni ye u kam wa u Kiang Nangbah man u kam u Best General in Guerrilla Warfare neibhah wa man u uwa pynemkaam ya ki built katkam ka thaw yong i wow yakhun pyrchah ya ki pharæng.

Ha kani ka sngi da pynkupburom leh ya ki President wa ki Secretary warim ka Seiñraij Jowai, da saam leh ya ki khusnaam cha kiwa jop ha ki yakob waphær waphær wa da pynman ha kani ka tayaaw.

Ynne i step u syntu sah kynmoo da booh leh da ka Kur Sookpoh Khad-Ar Wyrnai Jowai (Khynroo Khylood Committee) hei emlang u Damanha-Oo Rngad Secretary ka KKC, u Rangbahmi Kynjing Chairman ka KKC, u Puramon Kynjing kam u President ka Kur kamjooh u Dolloi ka Elaka Jowai chirup wa ki member ka kur Soo Kpoh khad-Ar Wyrnai, Jowai.