Chongchit ka Bamphalar ka Loomkyrwiang Dorbar Chnong

Syllad | The Rising MeghalayaApril 27, 2024

Ka Bamphalar toh kawi na ki rukom dustur wa da leh da pyndep ha chnong Jowai da ki kattu katni tylli ki dong ki chnat chwa wow sdang I rep I riang cha hali pynthor.

Kamtae ha uni u snem ka Loomkyrwiang Dorbar Chnong hei peit I pynlai ka Bamphalar Committee daman ko kawi na ki dong ki chnat wa pyndep nyngkong ya ka Bamphalar iong u ni u snem 2024 dei wa pynman ya ka Lehke Drama ha Yungwalieh ha ka sngi Khyllaw 26tarik Naitung katwa ha ka sngi wa bood wan Pynsin 27tarik da em I Ya Bamdoh Sniawbha ha Yungwalieh da waroh ki khon ka dong ka chnat, u Loom u pdein iwa man kat kam ka rukom-dustur wad a pynjooh sikai na warim.

Ha ka yalang yahkhmat iong ka miet lehke drama wad a pynlai da u Daioolang Pakma, Symbood Waheh Chnong da em I ngoohblai ngoohsyiem da u SD Laloo, General Secretary LDC neitae I klam kyrpang chaphang ka Bamphalar da u Lammat-oo Laloo, Waheh Chnong, LDC katwa u Arkiru Laloo, Secretary Bamphalar Committee hei pynkut da e u ki kyntien sniawngooh.

U Lammat-OO Laloo hawa klam chaphang ka Bamphalar da niawtang u wow kynmoo yei nam I pyrtuid ki waheh wasian, manbei manpa ka Loomkyrwiang kiwa em I sap I ka-it hei thoh ya ki parom wa ki sur  lehke drama wei da khana u leh wa ka Loomkyrwiang daman ko kawi na ki dong ki chnat wa bna nam iong kitu ki por wei I sap lehke drama iong ki waheh wasian ka dong da poor I leh cha kiwi ki chnong ki thaw kam cha Nongkrem, Moolamanoh wa kiwi kiwi.

Chooh chooh da khana u leh wa dang nachwa hei por lehke drama yei bynta iong I ak kynthai nae actress leh dahap beit pynriam da ki chynrang, iwa sniawsuk ong u Lammat-OO Laloo wa ka dong Loomkyrwiang toh ka dong kawa nyngkong dooh wow pynmih actress da ka kynthai wei nadooh kitae ki por kiwi ki dong leh dasdang ki u bood u pynchlur ya ki kynthai wow embynta ha ka lehke drama hei por Bamphalar.

Neiliang u Lammat oo Laloo, da kyrsu kyntu u leh ya ki khon khynroo khyllood ka wow man kiwa ka-it wa chongchit u embynta hei por Bamphalar wei wow kitkhia leh u pynjanai chooh chooh ya kani ka rukom dustur kawa pynioo yeitae I man kyrpang ka jaitbru hakhamt ka pyrthai.

Ya ka parom lehke drama wa e pyrtuid ka Dustur da thoh wei pyntoh pyntne da u Phrangsngi Shullai kawa man sakhiat ka parom wa e chiboon I snein I kroo ya kiwa wan peit wan sakhi najan najngai.