Chongkun ka Dorbar ki Kñi wa ki Kchu ki Siang ka Raij Jowai
Ka Dorbar Niam man ko ka chnat krehkaam kawa kongsan bha ha ki khon ka Niamtre kawa pynneh wow pyrkhat ya ki kaam niam hapoh ka Raij Jowai, ka Dorbar Niam ka Seiñraij Jowai haka 26 tarik Naisan da pynman ko ya Dorbar ki Kñi wa ki Kchu ki Siang ha Madan Kñia Pyrthai, Dulong Pohhali.
U Shape Paswet uwa man u Kñi ka Kur Paswet da e u ya ka phang wa ong “I Chwar U Pa Pyrkhat Wa Pynskem Ia Ki Kñi Phra Kur Phra Kmai” heiwa da khana u ya ka yutang kammon wa da seiñ ya ka chnong Jowai.
![](https://www.syllad.com/wp-content/uploads/2024/09/JIT-Vacancy-823x1024.avif)
Da khana u leh kammon wa sdang leh ya ka lehniam Behdieñkhlam wei kammon ki Kur yoh ki ka bhah ha ki kaam niam hapoh ka Raij Jowai.
U General Secretary ka Seiñraij, u Arwotki Sumer da klam u hajrong ka phang “I Dor I Pyrtuid Niamtre” uwa da batai yei man kyntang ka Niamtre ha ka jaitbru yong i.
Da batai u leh ya ki yurim wa ka Niamtre yieñ wei sneiñ ko ya ki khon yong ka nadooh wa dang im hadooh wa khlaad neini na sla khyndaw pyrthai wei kammon ka Niamtre yah ko wa ymtoh u e kut e jait cha u chynrang.
Neiliang u President ka Seiñraij Jowai, u Hercules Toi da klam u hajrong ka phang ” Ki Kñi Lyngba Ki Chnong Ki Raij Wa Ku Ka Niam Ka Rukom” heiwa da khana u ya i kaamran yong ki Kñi wow pyndep ya ka niam ha jar jiar ki yung, ki chnong wa ki Raij.
Da batai u wa u Kñi toh u chakri u Blai uwa pyndep ya ka niam ka rukom ha yung nadooh i kñia, i bia wa ki kaam niam hawa yap wei man u leh kam u Pa ha yung ka kurim.
Ha kani ka Dorbar da wan sakhi wei da pynkup burom leh ya ki Dolloi na kylleiñ ki Elaka ka Ri-loom Jaiñtia kiwa kynthup ya u Dolloi na Elaka Nangbah, Elaka Raliang, Elaka Shangpung, Elaka Mynso, Elaka Darrang, Elaka Nartiang, Elaka Nongtalang wa ka Elaka Nongjngi.
Chooh chooh ha kani ka Dorbar da pynkup burom leh ya ki Kñi ki Phra Kur Phra Kmai kiwa em hapoh ka Raij Jowai kiwa em bynta ha ki kaam niam hapoh ka Raij.
Ya ka Dorbar ynne da pynlai da u Pator ka Elaka Jowai, u Raymond Nartiang wei u S. Siangbood u Langdoh ka Raij Jowai da e u ya ki kyntien pdiang burom katwa neiliang U Dolloi ka Elaka Jowai, u Puramon Kynjing da e u ya ki kyntien Ngooh Blai.
![](https://www.syllad.com/wp-content/uploads/2024/05/Dorbar-Niam-ka-Seinraij-Jowai-9-1250x703.webp)
![](https://www.syllad.com/wp-content/uploads/2024/05/Dorbar-Niam-ka-Seinraij-Jowai-1-1250x703.webp)
![](https://www.syllad.com/wp-content/uploads/2024/05/Dorbar-Niam-ka-Seinraij-Jowai-2-1250x941.webp)
![](https://www.syllad.com/wp-content/uploads/2024/05/Dorbar-Niam-ka-Seinraij-Jowai-7-1250x941.webp)
![](https://www.syllad.com/wp-content/uploads/2024/05/Dorbar-Niam-ka-Seinraij-Jowai-8-1250x703.webp)
![](https://www.syllad.com/wp-content/uploads/2024/05/Dorbar-Niam-ka-Seinraij-Jowai-6-1250x941.webp)
![](https://www.syllad.com/wp-content/uploads/2024/05/Dorbar-Niam-ka-Seinraij-Jowai-5-1250x941.webp)
![](https://www.syllad.com/wp-content/uploads/2024/05/Dorbar-Niam-ka-Seinraij-Jowai-4-1250x940.webp)
Leave a Reply