CM Connect: Pynpaw ki shnong ka thain Ranikor ia ki jingeh ha ka liang ki surok, jingshah pynjulor ha ki hati bad kiwei

Syllad | The Rising MeghalayaJanuary 25, 2025

U Myntri Rangbah ka Jylla u Conrad K Sangma ha ka 24 tarik Kyllalyngkot u la shah shkor ia ka jingud jingnam jong ki shnong ki thaw ha ka prokram CM Connect ba la pynlong ha Ranikor, South West Khasi Hills. 

Ha kane ka prokram ki paid nongshong shnong na ka thain Ranikor ki la ioh ia ka lad ban pynsngew markhmat sha u CM ia ki jingeh kiba ki iakynduh ha kaba iadei bad  ki surok, ha ka liang ka um bam um dih, ki jingjia shah pynjulor ba khah khah ha ki hati khlaw, ka jinghiar ha ka kam ri jingri bad kiwei kiwei.

Ha kane ka prokram la ia don lang ruh ka Myntri ka Tnad ka koit ka khiah ka Kong Ampareen Lyngdoh, ki MLA Bah Pius Marwein bad u Bah Renikton Lyngdoh Tongkhar ha ka jingiashim bynta lang da ki heh ophisar kynthup ia u Principal Secretary u P. Sampath Kumar.

Lah ban kdew ba ka CM Connect kadei ka prokram ba la maitphang da u Myntri Rangbah ban poi sha ki paidbah jong ki shnong ki thaw bad ban sngap da lade ia ki jingsngewkhia jong ki nongshong shnong.Kane ka prokram ka pynioh kabu ruh ia ki paidbah ba kin pynpaw ia ki jingeh bad ki jingdondon ki jong ki hakhmat u CM bad ki ophisar bad halor ki sienjam kiba donkam ban shimkhia bad pynbeit mardor ha kane hi ka jaka.

Ka jingiakren kaba khluit bha ha kane ka prokram ka dei halor ka jingshah pynjulor ki mar rep bad ki iing ki sem ha ki hati khlaw ia kiba la pynpaw da ki nongshong shnong ka Mawpyllun.Halor kane u CM uba bat ruh ia ka Tnad Forest u la kular ba ka tnad ka shimkhia mardor halor kane ka phang.

Halor ki jingujor ba ki heh ka tnad Forest ki ju wan hapdeng ka jingbuaid haba pyntip ia ki jingjia shah thombor ha ki hati, na ka liang u CM u la kular ban shim ka jingpynshitom ia kino kino kiba shim sting ia ka kam. “Ka dei ka kam iap kam im jong u paidbah bad ngim lah shah ia ka jingleh sting,” u la ban jur.

Haba shim kabu lyngba kane ka rynsan CM Connect, ki nongshong shnong ka Nongnah ki la pynpaw halor ki lad ki lynti ban kyntiew ia ka kam jngohkai ha kane ka shnong kaba don ia ki jaka kiba itynnad.Halor kane u CM u la pynbna ba ka sorkar ka la dep lypa ban pynkhreh ia ka plan ban kyntiew ia ki kam jngoahkai bad ba ka la mang ruh T.30 lak ban tei ia ka resort kynthup ka jingpynbna ia ka surok kaba pyniasoh sha kane ka shnong ka jong ki.

Ki nongshong shnong na Keniang ki la pynpaw ka jingsngewkhia halor ka jingsniew ki lynti surok kaba la wanrah jingeh shibun khamtam ha kaba pynkit ia ki mar rep. Halor kane u CM u la pynthikna ban shimkhia halor kane ka jingpynsngew.

Kumjuh ki nongshong shnong ka Pomwadar, Tibbiching bad Phlangdiolin ki la pynpaw ka jingsngewkhia halor ka jingbym don ki Bank bad ki lad aijingsumar. Halor kine ruh u CM u la kular ban shimkhia bad aijingmut tuh ban sdang noh da ka Mobile Banking service ha kane ka thain. Nalor kata u la kular ruh ba ka mat kaba iadei bad ka koit ka khiah bad ka pule puthi yn shim kum ki jindonkam kiba hakhmat eh jong ka thain.

Ki nongshong shnong ka Khonjoy A kila pynpaw ka jingsngewkhia halor kiba bun ki jingeh bapher bapher bala mad da ki paidbah kiba shong ba sah ha khappud, khamtam ka jingbym biang ka umbam umdih bad ka bording elektrik.Halor kane u CM u la bthah ia ki ophisar ban pynbeit noh kham kloi ia kane ka kam.Halor ka jingujor ba pynslem ia ka jingpyntreikam ia ka Jal Jeevan Mission, u CM u la bthah ia ki ophisar ban pynthikna ba ki nongshong shnong ki dei ban ioh noh ia ka um hapoh u bnai Iaiong 2025.

Ha kane ka prokram u CM lem bad ki heh sorkar kila aiti ruh ia ki song jingiarap pisa na ki skhim bapher bapher sha ki nongioh bynta jong ka Ranikor C&RD Block.