COVID-19: Bthah ki Nongsynshar Shnong Ri Bhoi Mihngi ban shong quarantine ia kiba iakynduh ia u agent ka Safeshop

Syllad | The Rising MeghalayaJuly 21, 2020

Ka Synjuk Nongsynshar Shnong Ri Bhoi Mihngi hadien ba la iohkem pang COVID-19 uwei u bar jylla uba long kum agent kawei ka company Safeshop ha Bhoirymbong, kala kyntu ia baroh kiba iakynduh ia une u bar jylla ban shong set ialade ha iing (quarantine) bad ban pyntip mar mar sha ka tnad ka koit ka khiah.

“Ka Khubor ba sngewsih nga la ioh jingtip na CHC Bhoirymbong ba ngi la ioh COVID-19 positive case ha ka thain jong ngi. Uwei briew ba na ka company Safeshop ba na Berpata Assam uba ju wan sha kane ka thain jong ngi u la bit ia kane ka jingpang COVID-19. Une u briew u ai address ha Umeit ula wan ha CHC Bhoirymbong ha ka 10.07.2020 bad ula shong quarantine,” ong u Bah R Kharumnuid President Synjuk Nongsynshar Shnong Ri Bhoi Mihngi.

“Une u agent ka Safeshop ula iakynduh bun ki briew ha Bhoirymbong, Umroi, Umktieh, Umeit bad kiwei ki jaka.

Une u agent ka Safeshop uba la shong quarantine naduh 10 tarik u Naitung ula pyni ki dak ki shin bad la hadien bala test ia u la lap ba u dei COVID-19 positive hynnin ka sngi, kumta kino kino kiba la iakynduh markhmat ia u ha kine ki 1 bnai mynta ba kin sngewbha ban shong set ialade ha iing (self-quarantine) bad pyntip sha CHC control room Bhoirymbong ha u number +918730877579.

Ki Rangbah Shnong kin sngewbha ban pyntip paidbah ia kane bad mana shwa ia ki nongshong shnong ban leit Bhoirymbong khlem ki daw ba biang,” ong u president Synjuk Nongsynshar Shnong Ri Bhoi Mihngi.