COVID-19 | Jurip u Bah AL Hek iaki CHC-PHC ha West Jaiñtia, 40 jingthiah la buh ha Laskein CHC

Syllad | The Rising MeghalayaMay 1, 2020

U Bah AL Hek, Myntri ka tnad ka koit ka khiah ula shimkhia ban wan jurip dalade ban shim jingkhein ïaka jingpynkhreh ki jaka sumar CHC bad PHC ban ïakhun iaka khlam COVID-19 ha West Jaiñtia Hills District ha ka sngi Thohdieng.

U Bah AL Hek ha ryngkat ka jingsynranlang u MLA ka Mowkaiaw, u ma Nujorki Sungoh kila hiar sha Laskein CHC, Sahsniang bad Barato PHC kiba hap haka Constituency u ma Nujorki ban jurip bad ban shim jingkhein halor ka rukom pynkhreh ban iakhun ïaka khlam COVID-19.

La iadonlang ruh Director of Health Services (MI), Dr. Aman War bad u District Medical Health Officer u Dr, KC Ajar bad kiwei kiwei.

U Bah Hek ula hiar sha baroh kine ki jaka sumar ban ïakren bad ïasyllok bad ki doktor ki nurse halor ka jingpynkhreh bad ban pynbiang ïa ki jingduna ha Laskein CHC, Sahsniang bad Barato PHC khnang ban lah ban tem ïaka khlam COVID-19.

U Director of Health Services (MI), Dr. Aman War, ula ïathuh ba ka tnad ka koit ka khiah kala shimkhia bha ban pynbiang ïaki jingdonkam ki jaka sumar ha ki CHC bad PHC, watla ka jingpang kito kiba ïohkem pang khlam haka jylla kila jem lut.

Ula ong ba ka tnad ka koit ka khiah kala shimkhia bha ia kane ka kam bad dei halor kane ki hiar sha manla ki jaka sumar hapoh ka jingialam u Myntri ka Koit ka Khiah.

U Dr. Aman ula ong ba ha Laskein CHC ka don haduh 40 jingthiah kyrpang (Quarantine) ia ki suba pang COVID-19. Ka Laskein CHC kala biang nadong shadong ban sumar nongpang ki bym shitom jur bad lada shitom jur yn pynthiah ha Maternity and Child Health Hospital Jowai.

“Marsien lait ka lockdown yn pynpoi iaka Machine – Ray ha kane ka jaka sumar bad kiwei kiwei ki tiar ba donkam katkum ka jingdawa ban sumar ïa kino kino kiba pang,” ong u Dr. Aman bad ula ong ba la iakren ruh halor ka jingduna doktor, nongtrei kane ka jaka sumar.

U District Medical Health Officer, West Jaintia Hills District u Dr KC Ajar ba ki tiar iada bad ki tiar sumar nongpang katba ki ioh la pynpoi lut sha ki CHC bad PHC hapoh ka district.

Ka West Jaintia Hills kala ioh ar tylli ki Ventilator, ki PPE, hand sanitizers, ki gloves, ki mask bad ki jingthiah, ki blanket, tusok, ki syngkhlieh ha ka MCH Hospital, Panaliar, Jowai. 

“Ki jingthiah ha MCH hospital ruh la nang bun bad mynta ka don haduh 50 jingthiah nalor la thung iaki doctor, nurse bad nongiarap ha ki Corona Care Centre,” ong u Dr. Ajar.

Ki Corona Care Centre ba kynthup iaka St. Aloysius Hospital, Ummulong la buh 32 jingthiah bad haki hostel jong ka Kiang Nangbah Govt College, Jowai la buh 70 jingthiah.

U Bah Hek bad u MLA ka Mowkaiaw ha kane ka jingjurip ïa kine ki CHC bad PHC kila iakynduh ïaki nongialam shnong ban iaphylliew jingmut bad pan ka jingiatreilang ka jong ki ban ïakhun ban tem ia kane ka khlam.

Ha Barato bad Sahsniang PHC ruh la buh jingthiah ba kyrpang lada don nongpang.

“Ka jingwan jurip jong nga ia kine ki jaka sumar kadei ban shim jingkhein halor ka jingpynkhreh ki CHC bad PHCs ban ïakhun ïaka khlam COVID-19. Ngi ioh lad ban iakren ban phylliew jingmut bad ki nongialam shnong ban pynshai ba kane ka jingpang kadei kaba lah ban pynkoit da ka jingiatreilang,” ong u Bah Hek bad ia ki jingduna ha ki jaka sumar ruh yn pynbiang katkum ka jingdawa.

Ha kaba iadei bad ki kali Ambulance ruh lada donkam kyrkieh yn pyndonkam da ki 108 kiba pyniaid ka 108.

U MLA ka thain ula pynpaw ka jingsngewnguh ia u Bah Hek uba la shimkhia ban jurip dalade ïa kine ki jaka sumar bad la kyntu ruh ba pynbiang iaki kamra khnang ban lait n aka jingkhapngiah.