COVID-19: Pdiang sngewbha ka shnong Mukhap ia kiba la pyndep quarantine shnong

Syllad | The Rising MeghalayaJuly 8, 2020

Ka Dorbar Shnong Mukhap, West Jaintia Hills kala pdiang sngewbha ia baroh 17 ngut kiba la pyndep iaka quarantine shnong haka 7 tarik une u bnai.

Kine 17 ngut ki dei ki samla pule kiba sah kut haka lockdown ha Mangalore, Kerala, Hyderabad, Delhi bad Guwahati. Hadien ba kila wanphai shala shnong kila shong haka quarantine bala buh ka shnong haduh 28 sngi.

Kum ka dak ban ai mynsiem ia kine ki khynnah kiba la wanphai bad ban lait na ka jingshah peit poh haka imlang ka sahlang ka dorbar shnong Mukhap kala pynlong ka jingialang kaba lyngkot ban pdiang sngewbha ia kine ki khynnah hapoh ka jingialam u waheh shnong Mukhap Niawbait Ymbon, ki VDP, ki SHG bad Ki VO, ki Asha bad BDO ka Laskeiñ Block ma Brigstar Langbang.

Kawei na ki khynnah kaba sah quarantine kala ai khublei iaka dorbar shnong, ki ASHA bad baroh kiba don bynta ban iarap iaki ban pynbiang iaka jingdonkam jong ki bad ai mynsiem iaki hapoh quarantine.

Kine ki khynnah bad samla kiba sah ha quarantine shnong kum ka dak ban burom kylliang iaka jingsbun mynsiem bad iarap ki nongtrei Asha, Village Organisation, Secretary VDP bad Waheh Shnong kila ai sangebha iaki da ki tiar sah kynmaw..

U BDO Laskein ma Brighstar Langbang, ula sneng ula kraw ia kine ki samla bad khynnah halor ka jinglah jong ki ban pyndep iaka quarantine. Ula ai khublei ia baroh kiba mih shakhmat ban iakhun pyrshah iaka khlam COVID khamtam iaki nongtrei ASHA kiba khlem salia iaka kam kaba ki bat bad ka jingsiew kaba ki ioh, hynrei kila trei borbah ban iakhun iaka khlam bad ban ai ka jinghikai iaki paidbah bad kiba sah quarantine.

“Ka jingiakhun kam pat kut ngi dei ban iaishah bad ban im ryngkat bad une u khniang jingpang. Ngim lah ban im khlem leit trei leit ktah, hynrei kaba donkam ban ngin long kiba phikir bad lehkhuid bad bud ryntih iaki jingbthah ka tnad koit ka khiah ban sait kti khuid, ban nym lum ha ki jaka bun briew, ban deng iaki mask bad ba ngim dei ban bynthiew kat shaba lap bashem,” ong u BDO