COVID-19 | Pynsangeh shuwa ban kit dewiong na Assam ong ka JSM, HYC, EJNC bad ka MPUF

Syllad | The Rising MeghalayaMay 1, 2020

Hadien baka sorkar bad ka bor synshar district jong ka East Jaiñtia Hills kila pynmih iaka jingpynbna ban shah haduh 30 tylli ki trok kit dewiong ban shalan dewiong sha ki lai tylli ki kharkhana dewbilat, ka kynhun jong ki sengbhalang kila mih shakhmat ban pyrshah ia kane ka jingthmu baka dei hapdeng jong ka lockdown ban iakhun pyrshah iaka khlam COVID-19.

Kine ki sengbhalang kiba pyrshah ki kynthup iaka Jaintia Students’ Movement (JSM), Ka Hynniewtrep Youth Council (HYC), East Jaintia Circle, East Jaintia National Council bad ka Meghalaya People United Front, East Jaintia Hills Unit.

Kine ki seng kila pynpaw ka iaka jing sngewlyngngoh halor kane ka jingthmu jong ka sorkar ban ailad ban kit dewiong kine ki kharkhna dewbilat haduh 30 tylli shisngi wat hadpeng ka jingkhang khyrdep ban iakhun ban pyndkut iaka kynjri jingpur ka khlam COVID-19.

Baroh kine ki seng kila pyrshah iaka thmu jong ka sorkar ban kit dewiong ka Star Cement, Meghalaya Cement bad Dalmia Cement (Bharat) kiba don hapoh East Jaintia Hills District ban sain cement ha kine ki kharkhana.

Une u dewiong uba kine ki kharkhana kin kit ruh dei na Assam.

Baroh kine ki seng kila pynpaw ba kim lah ban pdiang ia kane bad kila pynpaw ka jingpyrshah kaba jur bad kynthoh ba kam don jingmut shuh ka lockdown namar lada 30 tylli ki kawei ka kharkhana ka mut 90 phew tylli haka shi sngi kin wan ki trok bad kane ka buh haka jingma bad kam don jingmut kata ka jingkhang khyrdep ban iada naka jingpur ka khlam COVID-19 ha kane ka jylla.

Baroh kine ki seng kila pyrshah bad ki dawa ban pynsngeh shuwa ïa kane ka rai tad haduh bala kut ka lockdown bad lada ka sorkar ka iaid shakhmat ban ailad ia kane ka jingkit dewiong bad kan hap ban shim ka jingkitkhlieh lada jia ba wan pur u khniang COVID-19 sha ka Rilum Jaintia.