COVID-19 | Synreit dawai pyniap khniang ka Municipal Board ha Jowai

Syllad | The Rising MeghalayaMay 14, 2020

Ban tem iaka khlam jingpang COVID-19 kaba la sar la jan ha baroh ki ri ka pyrthei kumjuh kaba la pur wat ha kane ka ka Jylla, ka Jowai Municipal Board (JMB) kala shimkhia ban pynlong iaka jingsynreit dawai khniang ha kylleng ka sor Jowai.

Mynta ka sngi Palei naduh ka por step ki nongtrei jong ka Jowai Municipal Board kila synreit dawai pyniap khniang ha ki dong bad ki shnong bapher bapher ha Jowai.

Ha kine ki khyndiat sngi bala dep, ka JMB kala dep pynlong ia kane ka jingsynreit dawai pyniap khniang haki jaka paidbah bad ki basa iew ha Jowai pynbud pat sha ki dong ki shnat haka thain Ladthalaboh bad kiwei kiwei.

Ha Lion Mission Compound kane ka jingsynreit dawai kala sdang naduh ka por 8 baje mynstep.

La synreit dawai haki lynti shnong ki khyrdop jong ki iing briew, ki nala, ki sawdong sawkun ka Community Hall kumjuh ki khrum kali ba set ha surok shnong bad ki kyndong kynshrot ka shnong.

Naka liang jong ki nongtrei ka JMB ki la iathuh ba kane ka jingsynreit dawai kin bteng ruh sha Dulong bad Tpep Pale.

U Bah Lamjingshai Suchen Waheh Shnong Lion Mission Compound ula ai khublei iaka JMB kaba la wan ban synreit dawai hapoh ka shnong bad ula ong ba na ka liang ka Dorbar Shnong ka la ai ka jingiatreilang bad ka sorkar ban ialeh pyrshah ia kane ka jingpang khlam.