Cyclone Remal: Khlad uwei, mynsaw 4 ngut na ki jingtwa khyndew, julor ki iing ki sem ha kylleng ki jaka
Uwei u briew u la duh ei ia la ka jingim katba sawngut kiwei pat ki la ngat ha ki jingmynsaw na ki jingtwa kiba la wan jia namar ka jingther jong u ‘lapbah naduh kine ki 24 kynta kiba la dep hapoh ka Jylla.
Ka Secretary in-charge ka Tnat Revenue & Disaster Management ka Kong Matsiewdor War Nongbri haka sngi ba Ar ka la pyntip ba ka jingkhyllem jong ka kynroh ha dong Wailong Sutnga kaba hap hapoh Wapung C&RD Block, East Jaintia Hills District ka la wanrah ia ka jingiap jong uwei u briew bad ka jingjulor ia ka iing. Une u ba khlad u dei u Ohi Nongtdu khun jong ka Kong Rati Nongtdu.
Ka la ong ruh ba sawngut kiwei pat ki briew ki la ngat ha ka jingmynsw hadien ka jingtwa khyndew hapoh ka surok Mawkynroh Bypass kaba hap hapoh Mawlai C&RD Block. Ia baroh kine kiba la mynsaw la pynkynriah noh shapoh NEIGRIHMS hospital na ka bynta ban aijingsumar.
U light tower hapoh JN Stadium,Polo, Shilong ruh u la khyllem noh namar ka jingjur lyer bad ka la don ruh ka jingkhyllem noh jong ki dieng hajan ka sem ap kali ha Last Stop ia kaba ki nongtrei ka Tnat forest ki la lah ban pynkhuid noh.
Na ka liang ka State Disaster Management Authority (SDMA) ka Jylla ka la pyllait ruh ia ka kaiphot ha kaba iadei bad ki jingjia shah pynjulor kiba la jia ha ki district bapher bapher ka Jylla namar ka jingwan syllad jong u Cyclone Remal ha kane ka Jylla ha naduh ka 26 haduh ka 28 tarik Jymmang.
Ka jingther u ‘lapbah bad ka lyer ba jur ha ka 27-28 tarik ka la wanrah ka jingjulor ia kawei ka iing bad ia ki nar post ilektrik ha ki bynta jong ka Eastern West Khasi Hills. Kumjuh ka jingtwa khyndew ha Nongkhlaw, Mairang Block ha ka 28 tarik ka la pynjulor noh ia kawei ka iing briew.
Kumjuh kane ka ‘eriong ha ka 28 tarik ka la pynjulor noh ia kawei ka iing ha ka shnong Mawten ha South West Khasi Hills, bad ki jingjia twa khyndew ki la ktah jur ia ki surok bad ia ka lain sam bording.
Ha East Khasi Hills ruh ki la don buntylli ki jingjia twa khyndew ha ka 28 tarik mynta u bnai, kata hapoh Kench’s Trace, Mawlai Bypass, Tyrsad Road, bad Lower Lumparing kaba la wanrah ia shibun ki jingjulor bad jingmynsaw.
Ka jingtwa khyndew ha ka surok ba 13 Km MR Road ha ka 28 tarik ha South West Khasi Hills ka la pynthut ia ka lain bording bad pynjulor ia katto katne tylli ki iing ki sem bad ktah ia ki sawtylli ki shnong.
Ka jingjia pom pyrthat ha Rongrong Bolsongchok kaba hap hapoh Songsak C&RD Block, East Garo Hills (EGH) ha ka 26 tarik mynta u bnai ka la wanrah ka jingshah pynjulor jong ki artylli ki iing briew.Katba ka jingsyllad jong ka lyer kaba jur ha ka 28 tarik ka la wanlam ka jingkhyllem jong ki dieng bad ka jingshah pynjulor kiba bun bah ki waiar bording ilektrik.
Katba ha ka 27 tarik ki la don haduh 22 tylli ki iing ki sem kiba la shah pynjulor, nalor kawei ka skul kaba la ktah ia kumba 125 ngut ki briew ha Kharkutta Block ha North Garo Hills, bad ka jingbteng jong ka lyer kaba jur ha ka 28 tarik ka la wanrah shuh shuh ka jingjulor bad ka jingshah khang jong ki lynti surok na ka jingtwa jong ki dieng.
Ha ka 27-28 tarik ka la don ruh ka jingshah pynjulor jong ki katto katne tylli ki iing ki sem bad ki nar post ilektrik hapoh South West Garo Hills.Ka la don ruh ka jingkhyllem jong ki dieng ha Siju bad Chokpot.Kumjuh ka lyer bad u ‘lapbah ba jur ka la wanrah ruh shibun ki jingjulor ha Baghmara.
Ka jingkhyllem jong ki dieng hapoh Tura, West Garo Hills ka la wanrah ka jingjulor ia ka jingtei jong ka MeECL Rongkhon.
Facebook
Instagram
Youtube
Twitter
Leave a Reply