Cyclone Remal: Trei tyngeh ka kynhun SDRF bad CDHG ai ijingiarap ha kylleng ki jaka

Syllad | The Rising MeghalayaMay 30, 2024

Ka Tnad Home Guards & Civil Defence (CD&HG) bad ka kynhun SDRF ki dang iai bteng ia ki kam aijingiarap ha ki bynta bapher bapher ka Jylla hadien ki jingjia shah pynjulor na u ‘lapbah bad ka eriong ‘erngit kaba la wan jia namar ka jingsyllad jong u Cyclone Remal.

U Bah Paul H Shylla, Divisional Commandant of Home Guards, Shillong & u PRO jongka Directorate of Civil Defence & Home Guards Meghalaya, Shillong lyngba u kyrwoh ula pyntip ba ki dkhot na ka Tnat Home Guards & Civil Defence (CD&HG) hapoh ka jingialam jong u  Sub-Inspector Bah F Lamare ki la lah ban weng noh mardor ia u dieng uba la khyllem bad leit ban ia kawei ka iing bad ka kali kaba dei jong u Bah Welson Siangshai hapoh ka shnong Pamrakmai, East Jaintia Hills. Lyngba ka jingkloi ka jong ki la lah ban khanglad na ka jingjulor kaba kham jur.

Ha kawei pat ka jingleit aijingiarap ki dkhot hapoh ka jingialam jong u Sub-Inspector Y. Challam ki la her sha ka shnong Tpeppale hadien ba ki la ioh jingtip ba u don uwei u dieng uba la khyllem ha ki sainar bording ilektrik kaba buh jingma shibun ia ki nongleit nongwan. Kane ka kynhun ha ryngkat ka jingiatreilang bad ka Tnat Meghalaya Energy Corporation Limited (MeECL) kumjuh ka Tnat Forest ki la lah ban pyndep mar mar ia kane ka kam.

Kane ka sienjam kaba ki la shim ka pynthikna ruh ba une u dieng ba la weng un ym pynjulor ia u nar post ilektrik lane ban pynthut ia ka kam sam bording, bad ka la shimpor kumba ar kynta ba kin pyndep ia kane ka kam.

Kumjuh ka kynhun SDRF ka la poi ruh sha kylleng ki jaka hapoh Garo Hills na ka bynta ki kam aijingiarap.Ka kynhun hapoh ka jngialam jong u Sub Inspector B D Sangma ki la lah ban weng noh ia u dieng uba la khyllem halor ki sainar ilektrik ha ka lynti surok kaban lam shapoh College of Community Science, Central Agricultural University, Sangsanggre, Tura bad ruh halor ka jingkhyllem dieng ha ki sainar jong u post ilektrik ha Matchakolgre, Tura ha ka 28 tarik mynta u bnai. Kane ka kynhun ka la leit ruh ban leit pynkhyllem noh ia uwei u dieng uba la jan khyllem bad buh jingma ia ki iing ki sem kiba don marjan ha Babupara, Tura.

Ha kajuh ka por ka SDRF ka dang pyniaid shakhmat ban weng ia uwei u diengbah u ba la khyllem noh ha Tura Civil Hospital khnang ban pynthikna ia ka jingshngain jong ki paidbah kumjuh ia ki briew kiba don hapoh kane ka hospital.