Da 25% pynbna ka sorkar ban kyntiew ia ka tulop ki nongtrei SSA

Syllad | The Rising MeghalayaJuly 31, 2024

Ka Sorkar Jylla ka la pynbna halor ka rai ban kyntiew ia tulop jong kumba 1200 ngut ki nongtrei (non-teaching staff) ka Samagra Shiksha Abhiyan (SSA) da 25 percent ka ban  treikam naduh ka 1 tarik Iaiong 2024. 

Ia kane ka rai jong ka Sorkar Jylla la pyntip da u Special Officer incharge Education department lyngba ka shithi sha u State Project Director, Samagra Shiksha (SEMAM) bad Director of School Education & Literacy, Meghalaya ha ka 26 tarik Naitung 2024.

Katkum ka shithi ka la ong: “Halor ka mat ba la kdew haneng, la bthah ia nga ban pynbna ia ka jingmynjur jong ka Sorkar ban kyntiew da 25% ia ka tulop jong ki Office Staff ka Samagra Shiksha (Non-Academic) ha ka Jylla, District bad Block MIS, DEO bad accountant bad ka ban treikam naduh ka snem mangtyngka jong u 2024-2025 (kata naduh ka 1 tarik Iaiong 2024). Ia kane ka jingmynjur la pynmih halor ka shithi ka tnad Finance (EA) kaba 18 tarik Naitung 2024.Kane ka la ioh ia ka jingmynjur na ki bor ba dei khmih.”

Ha kawei pat ka bynta, ka All Meghalaya SSA Non-Teaching Staffs Association (AMSSANTSA) haka 31 tarik Naitung ka la sdang ia ka jingiakhih da kaba shong kyllain mungor ha madan Malki ban dawa na ka Sorkar Jylla ba kan kyntiew noh ia ka tulop ka jong ki.

Haba ïakren bad ki nongthoh khubor, u finance secretary ka seng u Ricky Shullai u la ong, kila rai ban pynlong ïa kane ka jingïakhih shong khlem buh por ban dawa na ka sorkar jylla ba kan pyrkhat ban pynkiew ïa ka tulop jong ngi 80 percent ryngkat ka jingkiew ar percent katkum ka seniority bad san percent man la u snem.”

“Kumta, ngi la rai ba ngin bteng ïa ka jingïakhih jong ngi haduh ba ka sorkar kan da pynkhreh ban pyndep ïa ki jingkular jong ka kaba long ban pynkiew ïa ka tulop jong ngi,” u la bynrap .