Da 73 ron jop ka United XI ia ka Royal CC bad rah syndon ia ka nam lahduh ka super division Shillong Cricket Association

Syllad | The Rising MeghalayaFebruary 23, 2022

Ka kynhun ialehkai jong ka United XI, ka la lah ba kan pynliem noh ia ka Royal CC da 73 ron ha ka phainal ka lympung ialehkai super division, Shillong Cricket League, ka Shillong Cricket Association kaba la long ha madan ialehkai Criket ka JN Stadium, Polo haka sngi ba Ar.

Kane ka nam jop ka kynhun jong ka United XI ka la wan hadien ba ka la rah khatduh ia ka nam lahduh kane ka lympung ha u snem 2017.

Haba phai sha kane ka jingiakhun, ha ka jingiakynting pisa ne toss, la jop ia ka da ka United XI bad beit beit ka la kam trai da kaba kan tied nyngkong, ha kaba ka la lah ba kan kamai 193 ron hadien ba ka la hap noh 5 wiket na ki 40 ober.

U namtam napdeng ki nongtied jong ka United XI dei u Rohit Shah uba la lah ban kamai 72 ron ba la wan na ki 93 tylli ki bol bad bynrap lang da ka 34 ron na ki 38 tylli ki bol ba la kamai lyngba u Yogesh Tiwari.

Na ka liang ki nongkawang bol ka Royal CC, u Bipay Ray u la ioh ban khur 1 wiket na ki 8 ober bad ban ai 40 ron, katba u Aaron Nongrum u la ioh lem 1 wiket na ki 7 ober bad ai 41 ron.

Haba la dei pat ka pali ban wan beh ia kane ka thong, ki nongtied jong ka Royal XI ki la lah ban kamai tang 120 ron hadien ba ki la lap ba hap noh baroh ki wiket ha ka 31.2 ober.

Ka daw ka jingkhyllem ki nongtied jong ka Royal XI ka dei hadien ba u Abir Chakraborty bad u Bijon Dey ki la ioh ba kin khur mar 4 wiket.

U Abir u la  ioh ban khur ia kine ki 4 tylli ki wiket na ki 7 ober bad ai tang 18 ron, katba na ka liang u Dey ki 4 wiket ka la wan na ka 6.2 ober bad ban ai 33 ron.

Ki nongtied ka Royal XI kiba la lah ban kamai kham bun ron ki long u Nishanta Chakraborty u la lah ban kamai 31 ron ba la wan na ki 60 tylli ki bol bad u Abhishek Kumar 25 ron ba la wanna ki 18 tylli kibol.

Lada ngam kham bniah bha sha kane ka jingiakhun, ha lyndet ka jinglah ban khur ka United XI ia kane ka nam jop, ka jia long ba ha kane ka kynhun la khleh lang ki kato katne ki rang ialehkai ba la Rangbah bha  ha ka kynhun bad don lang pat sa ki khynnah kiba dang shu sdang ban khie ban san, haba ia nujor pat bad ka kynhun ialehkai jong ka Royal XI,  da shisha ka long ka kynhun kaba bun na ki nongialehkai kidei kiba ang shu sdang ban mih paw bad kiban dang iai khrehg ban sa nang paw ne tyngshain ha ki sngi ki snem ban wan.

Ha kaba kut jong ka jingiakhun, kanam man of the Match ka leit sha u Rohit Shah ka United XI halor ka 72 ron kaba u la lah ban kamai ha kane ka kynti iakhun, katba ka nam Man of the Series ka leit sha u Jason Lamare, ka United XI.

U Kongsan ba la wan ban ia sakhi lang shipor ia kane ka jingialehkai phainal dei u bah Paul Lyngdoh MDC Jaiaw Constituency ba dei artad u EM  ha KHADC, u symbud kongsan dei u bah Gideon L Kharkongor, u Hony Secretary ka Meghalaya Cricket Association, ryngkat ki dkhot nongkit kam jong ka SCA bad jong ka MCA.