Da i snaam e sñiawbha ka KKC ka Seiñraij Jowai wow kynmoo warom ya u Woh Kiang Nangbah

Syllad | The Rising MeghalayaDecember 29, 2023

Kam chibynta wow kynmoo warom ya ka lyngkhooh sngi yap wa 161 u Woh Kiang Nangbah, ynne ka sngi ka Khynroo Khyllood Committee (KKC) ka Seiñraij Jowai, da pynman ko ya i e snaam sñiawbha ha Blood Bank, Panaliar Jowai.

Chwa wow sdang i e snaam sñiawbha da em ka yalang wa tbian wa pynlai da u Sienmi Lato uwa man u Chairman ka KKC, wei da yoh i kyntien Ngoohblai na u Wansa Oo Dhar.

Da yoh i klam na u General Secretary ka Seiñraij, u Arwotki Sumer uwa da khana wa kani man ko ka sien wa le wa e snaam sñiawbha ka KKC.

Chooh chooh da yaroh u leh ya ka Committee wa da pynman ko ya ini i e snaam wow chakri ya kiwi ki khon ka Ri Pnar wow pynim ya kiwa em hapyrdi i kjut i chitom.

Ka Dr. P Shylla kawa man ka Incharge kani ka Blood Bank hawa e yei klam da ong ko wa u Woh Kiang Nangbah da yaleh laitlooid u na ki pharæng katwa ki khynroo ka KKC won yarap ki wow pynlait ya ki bru na i chitom i saja.

Da batai ko leh ya ki kyndon wa ye ki bru u e snaam.

Ya ka yalang da pynkut da ki kyntien khublei na u Kamnipaia Challam.