Da i sur ‘Here We Play’ u pynka-it, e mynsien ya kiwa yachimbynta ha ka Meghalaya Games 2024

Syllad | The Rising MeghalayaJanuary 5, 2024

Kamwa ki sngi ka taiaw iong ka Meghalaya Games 2024 ka wow man ha Nongbah Tura, dajan poi ki, kamtae leh ki nongpynkhreh pynkhrum pyntoh pyntne ya kani ka Meghalaya Games ha ka thong wow pynkmen pynka-it wei e bor e mynsien ya ki nongyachimbynta da chna kyrpang ki yei sur wa ong “Here We Play’.

Yeini I sur da pyntoh pyntne liang wanang da kawi na ki dhap tem wabna nam ka Jylla Meghalaya ka Summersalt chirrup I yakrehlang Ka Nokpante na Tura wei da rwai leh yeini I sur ha ki jait ktien wapher wa kynthup Khasi, Pnar, Garo wa English.

Ini I sur u man I leh kam I theme song iong ka Meghalaya Games 2024 ka wow man ha nongbah Tura nadooh ka 15 tarik hadooh ka 20 tarik Duiatra 2024.

Neiliang U Chief Minister Conrad K Sangma da ong u wa kyrmen yooluti u wa ini I sur u wanrah I yeitae I sniaw yaman iwi, u e mynsien I leh ya ki nongyachimbynta wei u sah kynmoo I leh hapyrdi waroh kiwa wan sakhi yak ani ka Meghalaya Games.

U Shakliar Warjri, Minister of Sports & Youth Affairs e u I yaroh wakhroo ya ka Summersalt wa ya ka Nokpante kiwa da chimkhia wow pyntoh pyntne yeini I sur, wei kyrmen u leh wa ki kyntien wa da thoh heini I sur u man ka khubor wa miat wabha ya ki khon khynroo khyllood ka Jylla kiwa em sap ha ki kam yalehke Sports.

Ya ki kyntien iong ini I sur da thoh da u Kit Shangpliang iong ka Summersalt deilang u Mikhael Marak iong ka Nokpante wei yeini I sur u tem kyrpang hapyrdi ki 3000 hajar ngut ki Athlete kiwa wa mihkhmat ya ki District wapher neibynta ki 19 tylli ki jait yakop.