Ban Pynrhem I’u Saihon Ba Dang Meh Tdem, Da Ka Amateur League Yn Pynlong Ka MFA

Syllad | The Rising MeghalayaMay 17, 2022

Sa kawei ka sien jam ba ka Meghalaya Football Association (MFA) ka khreh ba kan  jam shakhmat ka long ba kan khreh ban pynlong sa ïa kawei pat ka jait lympung ïalehkai phutbol hangne hapoh ka jylla bad kane ka dei ka ‘Amateur League’ 2022-23, kaba ki kynhun ban ioh iashim bynta kin  long 20 tylli bad kane ka lympung ïalehkai la mang ban pynlong ïa ka ha ki shiphew bnai.

Ka Amateur League, ngi lah ban ong ba ka long ban ïai pynrhem ïa u saihon ba la mih tdem ban pynrhem biang ïa u khnang ba yn lah ban pynieng rasong ïa ka ïalehkai phutbol, kaba dei kata ka number one sports jong ka jylla.

Haba ïakren bad ki lad pathai khubor mynta ka sngi u Treaurer ka MFA u bah Wanshan Kharkrang bad u bah Arki Nongrum, ki sngew ban kam ba ka jingthmu ban pynlong sa ïa kane kawei pat ka lympung ïalehkai kan long kum ka jingkyrkhu ïa baroh.

Khydiat katba lah ban sngewthuh ei na kaei kaba u bah Wanshan bad Arki ki pynpaw ha ki lad pathai khubor, ha kaba nyngkong eh, ka amateur league kan dei ka lympung ïalehkai phutbol ban plie lad ïa ki kynhun ne ki klob rit ba don ha ka jylla ban ïoh ban sei madan ïa la ki kynhun ban ia aireng bad kiwei pat ki klob ïalehkai ba don ha ka jylla.

Shuh shuh ki rang ïalehkai ba don kham pajih na ki sor ne khap sor ki sorbah ba don ha ki distrik ba don ha ka jylla, kan plie lad plie lynti ïa ki ban ïoh ban don bynta ha ka amateur league, ïa kaba kan da don ka jinglum thup ia ki kyrteng jong man la uwei pa uwei na ki nongïalehkai ban da paw ba ka kyrteng ka jong u la register ha kata ka kyrteng jong kawei na ki 20 tylli ki klob.

Nalor kata ka amateur league kan dei ruh ka lympung kaban khreh ban sei wat ïa ki referee, kaba dei lyngba kane ka lympung ba ka MFA ka khot ne wer ïa kito ki bym da don eh ka sap ban ïalehkai, hynrei ki nang bad tbit ha ka rukom ban pynïaid ïa ka phutbol ha madan.

Ïa kane ka lympung ïalehkai amateur league, ka MFA ka thmu ban pynlong naduh u bnai Jylliew u ban wan, ïa kaba la thmu ban sdang shwa nangne na nongbah Shillong bad ka por ne sngi ban pynlong ka lah ban long tang ha ka kut  jong ka taiew, ïa kaba ka MFA kan dang pynbeit bad pynkhreh thymmai biang ïa ki kat kumba shah ne dawa jong ka kam.

Nalor kata ka amateur league ka MFA, kan khreh ba kan sei bang sa shisien ïa ka mynsiem sngew sarong ïa ki shnong ki thaw, namar kumba ka long mynta ka phutbol kam da long than shuh kaba da shongshit paidbah, hadien ba ka jylla, namar ka jingdon ki klob ba ïakhun wat haduh ka kyrdan jong ka I. League, kiba bun na ki khynnah ïalehkai na ki shong ne ki dong, ki la hap ban mih noh, namar ki klob ki da siew biang dor ïa ka bainong ïalehkai.

Da kumta, khnang ba u paidbah un da sngewmeng ne sngew sarong ïa ka jingmih ki khlur ïalehkai ba don sap na ka shnong, sa shisien kin da mih paidbah ban hiar ban sakhi bad ai mynsiem ïa la ki khynnah ïalehikai, kaba ha kane ka kynti ka rta ba la shah ban iashim bynta ïa ki nongïalehkai ka long ym duna  ïa ka 20 snem shaneng.

Kaba sngewtynnad ha kane ka amateur league ka long ba ki kynhn ba ïashim bynta kin ïoh ïa ka por ne samoi ïalehkai kaba jlan bha ha kaba kin hap ban ïakhun ym duna haduh 35 tylli ki jingïalehkai.