Da ka common platform yn ialap election ki candidate ka Jowai ha Iawmusiang

Syllad | The Rising MeghalayaJanuary 26, 2023

Ka Dorbar Shnong Tympang-Iawmusiang, Jowai ryngkat ka Tympang Club, Jowai kila rai ba ha kane ka kynti kin pynlong da ka Common Platform ia ki kyrtong ki ban ia leh ia ka General Election sha ka 2-Jowai LA Constituency. Ia kane ka jingialap paidbah la pynbeit ban pynlong haka 16.02.2023, ha ka por 7:00 p.m. ha Tympang Club Hall.

Ka khubor na ka dorbar shnong Tympang kala ong ba la shim ia kane ka rai hadien ba la dep shong pyrkhat sani bha ha kaba la sngew khnang ba kan nym ktah palat ia ka por ki nongshongshnong khamtam kum kiba shong ha kane ka jaka kaba long mar pdeng ka sor Jowai ngi kwah ban pyndonburom ia ka rukom synshar paidbah (Celebration of Democracy) da kaba ioh jingshai na ka jingiatai/jingkren ki kyrtong/party na ka juh ka rynsan kan long kaba myntoi ia ngi. Kumta la pynbeit bad la shim ia ka rai ba ka bha ban pynlong da ka Common Platform bad ba yn lah ban pyndep ha ka shi sngi/miet ia kane ka kam.

Na ka liang ka Dorbar Shnong ryngkat ka Tympang Club ki buh ruh ia ki kyndon kumne harum:

• Yn ailad 30 minit marwei ia ki kyrtong/party ban kren pynshai ia ki nongrim ba ki ieng ialeh ia kane ka Election bad kumjuh ruh hadien ba la dep lut baroh, yn sa ai pat sa 5 minit marwei ban kren pynkut (Response Time).

• Yn leh da ka khalai nusib bad kin hap kren katkum ka number ba ki ioh ter ter.

• Yn shah tang 10 ngut ki ban synran ia u kyrtong ha kane ka Common Platform.

• Yn shah tang 3 tylli ki kali ki ban wan lang bad ki kyrtong ha kane ka miet bad ia kiwei ki kali jong ki nongkyrshan ki kyrtong kin hap ban buh shabar u pud ka Shnong.

• Ym shah ia kiba buaid tanglang ban rung shapoh ka hall ha kane ka miet.

• Na ka liang ka Shnong kan khot ia ki katto katne na ki seng trei mon sngewbha ban wan sakhi ia kane ka Programme.

Kumjuh ruh ia ki jinglut baroh na ka bynta kane ka Common Platform yn pynlut na ka Fund ka Shnong bad ka Club.