Da ka dukan ban im ja kpoh shna ka JHDS iaka longkmie haka shnong Mihmyntdu

Syllad | The Rising MeghalayaNovember 18, 2023

Hapdeng ka jingduh jingkyrmen namar ka jingban ka jingduk jingkyrduh hadien ka jingkhlad noh u Kpa ka iing, Ka Kong Martha Phawa na ka Shnong Mihmyntdu kaba hap hapoh ka West Jaintia Hills District, ka la shu im jakpoh ba pyndap pynbiang ia ka iing ka sem da kaba die dukan sha ha i iingtrep bajot la katto katne snem.

Watka hadien ba ka la ioh ia ka jingiarap da ki tin bala sam da u MLA ha u snem bala dep, hynrei kane ka longkmie kam shym la donlad ban thied ia kiwei pat ki jingdonkam ban maramot ia ka dukan jong ka. Kumta ha ka jingkyrduh ka la shu iaishah ban im jakpoh tang lyngba ine i dukan barit.

Dei ha u bnai Risaw 2023 ka Jaintia Hills Development Society, kum ka kynhun kaba juh phai khmat barabor sha ki longing baduk ba rangli, ha kane ka kynti ka la kner pat ia ki jingiarap da kaba shna thymmai ia ka dukan jong kane ka longkmie ryngkat bad ka jingiatreilang bad ka ophis jong ka KHUBLEI Germany.

Ia kane ka dukan sha la plie paidbah da u Chairman barim ka Balang Katholik Mihmyntdu u Ma Frederick Synnah, ha ka jingiadonlang u Fr. Manbha Pakem, Director ka JHDS,  u Coordinator ka JHDS u Bah Denis Kurkalang bad kiwei de ki Rangbah.

Ha shwa ban aiti ia katei ka Dukan, la don ka jingialang ba lyngkot ia kaba la pyniaid da u Ma Denis Kurkalang. Haba ai jingkren u Ma Frederick Synnah u la ai ka jingkhublei ia kitei ki ar tylli ki Organisation kiba don ka mynsiem ban shakri ia ki briew kiba don ka jingduna ha ka liang ka ioh ka kot. U la kyntu ruh ia ki nongiohkynti ia katei ka dukan ba ki donkam pat ban treishitom ban sumar bad ban nangpynheh shuh shuh ia kaei kaba ki la iohpdiang.

Hadien ka jingot ia u Ribbon da u Kongsan, la aiti noh ia katei ka dukan sha ka Kong Martha Phawa ryngkat bad ka jingkyrkhu kyrdoh da u Director Ka JHDS u Fr. Manbha Pakem.