Da ka duwai ka phirat ban iada naka jingpang khlam COVID-19 kut ka Behdieñkhlam ka Seiñraij Tuber

Syllad | The Rising MeghalayaJuly 19, 2021

Ka lehniam ba saw sngi lai miet ka Behdieñkhlam jong ka Seiñraij Tuber kaba long ha Tuberkmaishnong, East Jaintia Hills kala poi sha kaba kut da ka duwai phirat bad kyrpad kyrpon na u nonghbuh nongthaw bad ki blei ki syiem ban iada na ka khlam ka ngoh COVID-19 haka sngi Nyngkong.

Kane ka Behdieñkhlam kala sdang naduh 16 tarik une u bnai bad la pyndep ia baroh ki jinglehniam da kaba bud ryntih iaka adong adit COVID-19.

Kane ka Behdieñkhlam ka dei kaba ba heh tam ha rilum Jaiñtia, mynta u snem ruh kala long kaba rit, hynrei kaba iaid beit iaid ryntih hapoh ka jingpyniaid u Langdoh, uba dei ka khlieh jong ka niam ha Tuber kiba la lah ban pyndep jinglehniam ha khloo blai ne law kyntang bad ai ka nguh ka dem ïaki Ryngkew ki Basa ka raij Tuber kaba long haka sngi Robibar.

Ka Raij Tuber ka kynthup iaki 11 tylli ki shnong na West Jaintia Hills bad palat 18 shnong na East Jaintia Hills ki ju wan rah ïa ki rong jong ki ban noh haka Biar ne Aitnar ha Tuber man u snem 60-65 tylli, hynrei mynta ka kynti la wanpoi tang 27 tylli ki rong.

Ha une u snem naka daw jong kane ka khlam la hap ban pyrkhing noh ïaka jingwan ïashim bynta ki shnong kiba pher bapher bad la shah tang 23 ngut shi shnong ban iashimbynta.

Ki Kynrem ki lyndan kiba wan sakhi ia kane ka Behdieñkhlam ki dei u Myntri sorkar uba long ruh u MLA ka thain u ma Kyrmen Shylla, u Deputy Commissioner, East Jaintia Hills u E Kharmalki bad Superintendent of Police Jagpal Singh Dhanoa, IPS, u dolloi elaka Jowai ma Puramon Kynjing nalor ki nongialam ka Seinraij Tuber ba kynthup ia u president u ma R Harvis Phawa, General Secretary Jobly Sana bad kiwei kiwei.

U Ma Kyrmen Shylla haba kren ula khublei Behdieñkhlam ia baroh ki khun ki raiot ka Seinraij Tuber ba kin ioh iaka met kaba shait ka khlan bad kin biang ka kamai kajih bad ban roi ban par salonsar.

Ula banjur ruh ia baroh ban ai iaka tika COVID-19 ban iada ialade bad ban iada ia kiwei naka jingma ka jingpang khlam COVID-19. “Ka jingai tika ka dei ka lad jingiada bad lada iabit iaka jingpang ruh kan kham pynduna iaka jingshitom kaba jur bad ban lait na ki jingjia ba sngewsih,” la ong u ma Kyrmen.

Haba pynkut iaka Behdeiñkhlam ka don ka jingïasleit ne ïalympat bad ka jingiatan bhang. U bhang u dei u dieng uba don ar pnat uba ki pyndonkam pat ha ka rukom kaba ki khot ka ïatan bhang. Ka ïatan bhang ka ïasyrïem ïaka Dat Lawakor ha ka Behdieñkhlam ka Raij Jowai ha kaba un bha u kba u khaw sha ka liang kaba jop ha kata ka jingïatan.

Ha kine ki ar tylli ki jinglehniam ka phang nein kala jop bad la ngeit ba yn miat yn bha u snem bad ban beh shajngai iaka sniew ka smeh ka imlang ka sahlang.