Da ka Food Fest pynlong ka RC Eve Secondary School Mihmyntdu

Syllad | The Rising MeghalayaNovember 6, 2024

Kum shibynta ban pynmih pisa na ka bynta ban shna bad pynmih ia ki kamra klas, ka RC Eve Secondary School Mihmyntdu ka la pynlong da ka Food Fest haka taiew lehkmen ka skul (School Week) kaba iaid shait shait mynta.

Ia kane ka School Week la pynlong haka sien kaba nyngkong eh ha kane ka skul.

Ka Kong Ailinda Dkhar, kaba mih khmat ha ka jaka U Minister Kyrmen Shylla kala plie paidbah ia kane food fest haka 6 tarik u Naiwieng kum ka kongsan. La iadonlang u Jersom Shylla, president Jaintia Students’ Union (JSU) kum u symbud kongsan, u Ma Chemborki Ksoo, Asst. Technology Manager Amlarem Block kum u special guest, ryngkat bad kiwei de ki riew donburom kiba kynthup ia u Fr. Hilarius Lamare, Parish Priest Jowai Parish, u Fr. Manbha Pakem, Director ka JHDS, ka Sr. Maria Joseph, Superior DSH Convent Mihmyntdu, Ki nongshah khot sngewbha, ki nonghikai bad ki khynnah pule jong kane ka skul.

La pyniaid ia ka prokram ba lyngkot da u Chairman ka SMC u Ma Fedrick Synnah ha kaba u la batai lyngkot shaphang kane ka shlem ai jinghikai kaba kdup lut ia baroh khamtam kito ki khynnah ki bym iohlad ban pule ha kiwei pat ki Skul namar kiba bun ki Daw.

Haba ai jingkren ka kongsan Kong Ailinda Dkhar ka la ai ka jingiaroh ia ki nongpyniaid jong kane ka skul kiba la shim ia kane ka sienjam ban pyniar shuh shuh ia ka jingshakri jong ka ia ki khynnah ba donkam jingiarap. U symbud kongsan, u Ma Jersom Shylla u la ong ba ka jingdon jong kane ka skul ka la long ka kabu ksiar ia khynnah baduk ban bteng ia ki jingpule jong ki wat hapdeng ki jingeh kiba bun. U la kyntu ruh ia ki khynnah jong kane ka skul ba ki dei ban treishitom bad minot bha ha ki jingpule jong ki khnang ba kin ioh ia ka lawei ba phyrnai.

Ha kane ka sngi la don ka jingpyni nam ia kiba bun jait ki jingbam kiba la pynkhreh da ki khynnah skul jong ka tei ka jaka pule.