Da ka iakob siat khnam ki kynthei pynlong ka DSO-EJH ha Rymbai Wahshnong

Syllad | The Rising MeghalayaMarch 11, 2025

Shi bynta ban kyntiew ia ka sport hapoh ka district bad ban khring ia ki nongwan iashim bynta hapdeng ki kynthei, ka tnad sports ka sorkar Jylla ha ryngkat ka jingiatreilang bad ka ophis ka District Sports Officer, East Jaintia Hills District bad Rymbai Government Higher Secondary School Khelo India Centre ha ka 8 tarik Lber ki la pynlong ia ka jingiakob siat khnam ha madan Rymbai Wahshnong, East Jaintia Hills District.

Ha kane ka sngi la wan iashim bynta ruh da ka DSO, East Jaintia Hills District ka Kong Stephanie M Rapsang ha ka jingialang lang ka Principal, Rymbai Government Higher Secondary School, Kong Younilas Lamare, Finance Secretary ka Shnong Rymbai u Bah CF Bareh, General Secretary, East Jaintia Hills District Sports Association (EJDSA), Bah Coming Tlang bad kiwei kiwei.

Ha kane ka jingiakob la sakhi ia ka jingwan iashim bynta shitrhem jong ki kynthei na ka thain, kata naduh ha ka kyrdan Senior, Junior bad Sub Junior ha kaba la sam ruh ia ka khusnam da ka song pisa sha ki nongjop kaba long T.1500/- kiba wan nyngkong, T.100/ kiba wan ba ar bad T.500/ sha kiba wan ba lai.

Ha ka jingiakop hapdeng ki Senior, ka Isabella Tlang ka la ioh ia ka nam lahduh, bud sa ka Gratify Nongpluh bad ka Aibanhun Lyngdoh ha ka kyrdan kaba lai.

Ha ka thup Junior ia ka nam lahduh la ioh rah da ka Jasmine Nongpluh, ba ar ka Ebanroiki Bareh bad ka Fatima Lyngdoh ha ka kyrdan kaba lai.

Katba ha ki Sub-Junior ia ka nam lahduh la ioh rah da ka Philawanshwa Thoo, bud sa ka Tredaka Nongtdu bad ka Victoria Rymbai  ha ka kyrdan kaba lai.