Da ka iing ka skul kaba thymmai ai sngewbha platinum jubilee u ma Lahkmen iaka Ammutong Govt LP Skul

Syllad | The Rising MeghalayaDecember 9, 2022

U Ma Lahkmen Rymbui Myntri ka tnad kam pohiing bad ka tnad pule Puthi ula ai sngewbha platinum jubilee ne rakhe dap 75 snem da ka iingskul kaba thymmai iaka Ammutong Govt LP Skul (1947-2022) haka sngi Palei.

U Ma Lahkmen Rymbui haba kren haka jingialang pynkut iaka jubilee ula pynpaw ka jingsngewnguh ïaka Balang U Blei kaba la ai jingshari jong ka la 75 tylli ki snem ban sam jingnang jingstad sha ki khynnah jong kane ka shnong.

Ula ïaroh bad ai mynsiem shuh iaki nonghikai ban nang treishitom shuh shuh ban kyntiew iaka pule ka puthi kane ka thain katkum ka jingiaid ka por.

Ka Amlarem Sub Division kadei kaba donbok tam namar naki 70 tylli ki LP School kumba 24 tylli ki skul kiba la jot ka sorkar ka la tei ban pynbha pynmiat ïaki bad mynta la pynkhreh ban shna pynbha sa San tylli ki skul, la ong u Bah Rymbui.

U Ma Lahkmen ula ba iaka ka Amutong LP Skul la mang ban tei iaka haka dor kaba T. 44 lak. Ula ong ba haduh 20 tylli ki ïing skul ha Amlarem Constituency la dep mang ban shna pynbha haka 37 lak tyngka kawei bad 44 lak tam tyngka kawei.

Ula ïathuh ruh ba ka skhim sam umbam umdih kaba 5 klur tam kaba la ïoh haka kyrteng jong ka Amshipai ka jingpynkhreh ban shna ka la ïaid shait shait bad ki shnong naduh Amshipai, Shmiashyiang, Mawlong, Amutong bad Pamtadong kin ïoh jingmyntoi na kane ka skhim.

U Myntri ula pyllait paidbah ruh ïaka kot sah kynmaw ne Souvenir jong ka skul kaba la thoh ïaka jingïaid lynti jong ka skul naduh u snem 1947 haduh 2022 bad ka la don ruh ka jingpynkup burom ïaki nonghikai barim. 

Ia kane ka skul la sdang da ka Balang U Blei Ammutong bad hadien la shimti noh da ka Jaintia Hills Autonomous District Council ryngkat ka shnong bad da ka jingnangroi jong ka pule puthi la nang pynbha ïa kane ka skul da ka tnad pule puthi ka Jylla haduh mynta.

Ha kane ka sngi la iadonlang ka Kong S Pyrtuh SDSEO, Amlarem Sub Division bad iaka jingïalang la pynïaid da u Majesty Sten Secretary Shnong haka jingdonlang ki riew rangbah ka thaiñ, ki kmie ki kpa, ki nonghikai barim bad ba thymmai, ki nongshah khot sngewbha bad ki khynnah skul ha phyllaw ka skul mynta ka sngi.

La pynshongshit ïaka jingleh kmen da ki jingrwai jingshat na ki khynnah kane ka skul.