Da ka iing pynshna ka JHDS bad ka Khublei Germany iaka longiing ha Mihmyntdu

Syllad | The Rising MeghalayaAugust 1, 2024

Kum shibynta ban nohsyniang ha ka imlang sahlang khamtam ban iarap ia u duk u suk, ka Jaintia Hills Development Society (JHDS) ha ryngkat ka jingkyrshan ka KHUBLEI Germany kila aiti iaka iing ba lah dep pynshna bha ia kawei ka longing baduk kaba don ha ka Shnong Mihmyntdu West Jaintia Hills District haka 1 tarik Nailar.

Ia kane ka iing la noh syniang da ka iing ka sem jong ka Hannelore bad U Dieter na ka Ri Germany bad la pynshna bad pynbit pynbiang da ka Jaintia Hills Development Society (JHDS) kawei na ki Seng Treimon Sngewbha ha rilum Jaintia.

Ia kane ka iing ba la dep shna ryngkat bad katto katne ki tiar ba donkam kiba kynthup ia ki Shuki Sofa, 2tylli ki jingthiah, 10 kylli ki stole, ka duli ka miej la aiti noh sha ka Kong Lumbiang Sana ryngkat bad san ngut ki khun ba dangrit da ka JHDS. Shuwa ban aiti ia kane ka iing, la don ka prokram ba lyngkot ba la pyniaid da u Bah Denis Kurkalang, Coordinator ka JHDS ha ka jingiadonlang u Fr. Manbha Pakem, Director ka JHDS ryngkat bad kiwei de ki Nongialam ka Balang Katholik Mihmyntdu.

Shuwa ban ot ia u ribbon la ioh ka jingduwai kyrkhu kyrdoh da u Fr. Hilarius Lamare, u Parish Priest ka Jowai Parish ryngkat ka jingsynran lang u Fr. Simeon Sungoh, uba long u GB Member ka JHDS. Ha kaba kut ka prokram, ka Kong Lumbiang Sana ka la ai khublei ia ki nongiarap, kyrpang eh ia ka JHDS kiba la shim ia kane ka sienjam ban pynioh ia ki kane ka iing ba paka namar baroh shikatta ki la shu shong ha ka iing ba la jot bha.