Da ka “Independence Day Run-2023” yn pynlong ka ophis u DC bad DSO West Jaintia Hills

Syllad | The Rising MeghalayaAugust 10, 2023

Shibynta ka jingrakhe ia ka sngi laitluid jong ka ri ka ban long ha ka 15 tarik mynta u bnai, na ka liang ka Ophis u Deputy Commissioner, West Jaintia Hills District ryngkat ka jingiatreilang bad ka District Sports Officer, WJHD, Jowai kan pynlong ia ka jingiakop mareh thong ba la tip kum ka “Independence Day Run – 2023” na ka bynta ki shynrang bad kynthei (open category) ha ka 15 tarik Nailar 2023.

Kane ka jingmarrh kan sdang ha ka por 6 baje mynstep na Main Gate Kiang Nangbah Stadium sha Ladthadlaboh Main Road –  Jowai Public School – Gate Polytechnic – Kshaid Rymphum – Salaroh – Dulong Poh-hali Road – Dulong – Pamhadem – Panaliar (Civil Hospital) – Iongpiah –  Mission Compound – H.K.Singh School – D.C Office – New Hill – National Highway –  bad pynkut ha Kiang Nangbah Indoor Stadium.

Na ka liang u DSO, WJHD u Ma K Passah lyngba une u kyrwoh u pyntip ruh ba ka rejistar kyrteng na ka bynta baroh ki nongiashim bynta yn leh ha katei hi ka sngi 15 tarik ha ka por 5:30 mynstep thik. Kumta na ka liang ka ophis u DSO ka WJHD ka khot sngewbha ia baroh kiba kwah ban iashim bynta tang napoh ka district sha kane ka jingiamareh thong.

Ki nongjop ha kane ka jingiakop kin ioh rah da ka song pisa kynthup ia ki jingbuh sahkynmaw. Kumta na ka liang ka ophis ka khmih lynti ia ka jingwan iashim bynta shitrhem da ki nongshong shnong.