Da ka jaka tyrwa u Syiem Sohra ia ka Sorkar ban shna ia ka kad liengsuin thymmai kaba pura

Syllad | The Rising MeghalayaNovember 9, 2024

U Syiem ka Hima Sohra u Bah Freeman Singh Syiem ha ka 8 tarik u Naiwieng u la pynlong ka jingleit iakynduh ia u Lat ka Jylla u CH Vijayahankar ha kaba u la tyrwa ban pynioh jaka sha ka Sorkar Jylla na ka bynta ban shna ia ka kad liengsuin ba pura lyngba ka UDAAN Scheme ka Sorkar India.

 Ka UDAAN Scheme ka dei ka skhim kaba thmu ban kyntiew ia ki lad pyniasoh lyngba ki jaka suin hapoh ka thain bad ka ban plie ruh ia ki lad ha ka leit ka wan da ki liengsuin ha ka dor kaba tad sha ki jaka kiba kyndong bad kaba don jingiadei bad ka thong jong ka Jylla ban kyntiew ia ki jingtei bad ha ki kam jngohkai pyrthei.

U Lat ka Jylla u la pynpaw ka jingsngewnguh ia kane ka sienjam ba la shim da u Syiem bad pynpaw ruh halor ka jingkongsan jong kiba kum kine ki project kiba thmu ban kyntiew ia ka ioh ka kot ka Jylla bad ia ki lad pyniasoh.

Na ka liang u Lat u la kular ia u Syiem ba ia kane ka jingtyrwa un sa phah sha ki bor ba dei khmih na ka bynta ban bishar bniah bad ban shim rai.

Kane ka jingtyrwa kan dei ruh ka sienjam kaba kongsan ban kyntiew bad pynkhlain ia ki lad pyniasoh hapoh ka thain bad ban kyntiew ia ki kam jngohkai ha ka thain Sohra bad ka ban nangai jingkyrshan shuh shuh halor ka thong ban kyntiew ia ka ioh ka kot bad ka roi ka par jong ka Jylla.