Da ka jingduwai lang yn pynlong ka Khasi Jaiñtia Presbyterian Assembly halor ka jinglong jingman ka ri hapdeng kane ka khlam COVID-19.

Syllad | The Rising MeghalayaMay 10, 2021

Ka K.J.P. Assembly ka kyntu bad ka khot sngewbha ia ki parabangeit baroh jong ki Balang kiba hapoh ka KJP Assembly bad ia kiwei ruh ban iasnohkti lang ha ka Jingiaseng Duwai ba kyrpang ha la ki jong ki ïing ki sem na ka bynta ka jinglong jingman ka ri jong ngi hapdeng kane ka khlam COVID-19.

U Rev. P. Hynñiewta, Senior Administrative Secretary, KJP Assembly ula ong ba kane ka jingduwai lang kan long haka 13 tarik Jymmang haka por 7-9 PM.

Ki mat ban duwai ki long na ka bynta ka jinglong jingman jong kane ka khlam kaba la ktah ia ka ri bad ia ka pyrthei baroh kawei.

Na ka bynta ki briew kiba lah ioh positive na une u khniang jingpang ba kin iohmad ia ka jingpynkhiah.

Na ka bynta kito kiba don ki jingshitom kiba la kham slem (chronic) bad kiba donkam ban ioh ia ka jingsumar kaba kham tikna bad janai, hynrei kiba la duh ia ka lad ban leit sha ki jaka sumar na ka daw jong ka jingwan lynshop jong une u khniang jingpang. Ngin duwai ba U Blei Un da isnei ban pynkoit bad aibor ia ki ha kaba kum kane ka por.

Na ka bynta ki ïing ki sem kiba la dei ban duhnoh ia ki baieit bathoiñ na kane ka khlam, ba kin ioh ia ka jingpyntngen ha ki dohnud bad mynsiem jong ki lyngba U Mynsiem Bakhuid U jong U Blei.

Na ka bynta ki jaka sumar (hospital) bad na ka bynta baroh ki nongtrei ha ka koit ka khiah, kata ki Health Workers kiba don ka bynta kaba hakhmat eh ban ai ka jingsumar ia kito kiba shahktah ha une u khñiang jingpang, bad ruh na ka bynta baroh ki Front line workers ba kin ioh ia ka mynsiem jong ka jingshlur bad ruh ba kin mad ia ka jingiada na U Blei hapdeng ka jingtrei shitom ka jong ki na ka bynta ban ialeh pyrshah ia kane ka khlam.

Na ka bynta ki nongsynshar jong ka Ri bad jong ka jylla ka jong ngi, ki nongialam ha ki shnong ki thaw, ki District Administration ba kin ioh ia ka jingstad bad jingshemphang na U Blei hi ba kin lah ban thaw ki lad ha kaba lah ban tehlakam ia ka jingpursted une u khñiang jingpang.

Na ka bynta ka jingialong kawei bad ka jingkohnguh jong ki nongshongshnong (citizen) ia ki jingpyniaid bad ki jingbthah na ka liang ki bor ka koit ka khiah (Health Department) bad ka sorkar.

Na ka bynta ki Nongialam jong ka Balang bad na ka bynta ka Balang hi ba U Blei Un pyndonkam ia ka, ba kan long ka jingpyntngen ia kiwei kiba don hapdeng ka jingnoh mynsiem namar kane ka khlam.

Na ka bynta ki Nongsharai bad ki Nongialam jong ka Synod, ka Assembly bad ki Balang baroh ba U Blei Un ai jingshai bad ai jingstad kumno ban iaid nangne shakhmat, hapdeng ki jingkylla bad ki jingialeh kiba wan ryngkat bad kane ka pandemic.

Na ka bynta ki longiing longsem ha kylleng ka ri, ba U Blei Un sumar kyrpang ha kaba kum kane ka por bad ban iada na ki bor jong ka jingdum bad ki bor jong ka pop kiba ialeh ban pynpait pynpra bad tuh noh ia ka jingsuk bad ka jingkmen napdeng jong ngi.

Na ka bynta ki khun jong ka balang bad ki para ri kiba don shabar jong ka jylla bad ka ri hapdeng ki jingpule bad ki jingtrei jong ki. Ba U Blei Un ri Un sumar ia ki bad ba Un pyntngen ia ki wat haba kim lah ban don ryngkat bad ki bahaiing hasem bad ki baieit bathoin jong ki ha kaba kum kane ka por.

Ngin duwai kyrpang na ka bynta ki khunswet, ki ‘riewkynthei kiba im ha ka jingsheptieng bad ka jingartatien, ba U Blei Un long U kpa bad u nongiada, u nongpyndap bad u nong sumar na ka bynta jong ki.

Na ka bynta kito ki longiing ba duk bad kyrduh, kiba kamai kyndoi jakpoh man ka sngi bad kiba ka trei ka ktah bad ka khih ka kamai ka jong ki ka lah hiran bad sangeh lyngba ki jingpyrkhing ba bunjaid ba ka sorkar ka hap ban wanrah na ka bynta ban iada ia ngi lang baroh na kane ka jingpur sted jong une u khniang.

Na ka bynta ki khun hep kiba rit bad ki khun samla jong ka balang bad kylleng ka ri, kiba la dei ban duh noh ia ka lad ban leit sha ki skul, ki college bad ki jaka pule jong ki. Ba ka jingartatien bad ka jingsheptieng(Depression) kan ym ioh ban bsut bad pynbakla noh ia ka rukom pyrkhat jong ki.

Na ka bynta kito ki bym pat shym la ithuh bad pdiang ia U Jisu Khrist kum U Trai bad U Nongpynim jong ki, ba kin lah ban sngewthuh ba U Blei jong ngi, U long U bym ju kylla bad Uba lah ban pyllait sha shiliang.