Da ka jinghikai halor ka tika COVID-19 rakhe lyngkhuh snem ka BAM ha Jowai, pynkup burom iaki nongialehkai Kickboxing

Syllad | The Rising MeghalayaSeptember 14, 2021

Ka Bouncer Association Meghalaya (BAM) Jaintia Hills ka la rakhe iaka lyngkhuh snem ba shisnem ka jingiaid lynti jong ka ha rilum Jaintia da kaba pynlong iaka jingai jinghikai halor ka jingai dawai tika COVID-19 ban pynshlur iaki samla kiba la dap 18 snem haduh kiba la rangbah ban ai iaka tika ban iada ialade n aka jingpang khlam haka sngi ba Ar.

Ha kane ka jingrakhe dap shisnem pura, la pynlong da ka jingpynsngewthuh paidbah ne Awareness Programme shaphang u dawai tika COVID-19 bala batai da ka Dr. Mary Pajat District Extension Educator DM&HO.

Haba ïadei bad ka jingpang khlam COVID-19 ka Dr Mary Pajat kaba la ong ba kadei ka khlam kaba pher bha na kiwei ki jait khlam.

Kane ka khlam COVID-19 ka ktah ymtang ïaka koit ka khiah jong u briew hynrei ka ktah nadong shadong kynthup naduh ka kamai kajih, ka pule puthi, ka rukom leit rukom wan, ka rukom im rukom ktah bad ka ktah ruh wat ïaka jingmane blei jong ki briew.

Haba ïadei bad u dawai tika, ka la ong ba tang ka tika hi ka lah ba lah ban ïada na ka jingïabit jingpang khlam COVID 19.

U kongsan u Ma Ebor Lyngdoh District Transport Officer, West Jaiñtia Hills ula ong ka BAM ymtang ba ka kyntiew ïaka jingkoit jingkhiah jong ka met u briew hynrei ka kyntiew ruh ïaka jingshem phang ha baroh ki liang.

Ha kane ka sngi ka BAM ka la pynkup burom ruh ïaki rang bad thei ïalehkai kiba la wanrah jingjop ïaka Jylla haka lympung ïalehkai Kickboxing ha Dayanand Bandodkar Stadium, Mapusa, Goa, haka jingïalehkai kaba la long naduh ka 26 tarik haduh ka 29 tarik Nailar 2021 haka jingïalehkai jong ka WAKO India Seniors & Masters National Kickboxing Championship 2021.

Kine ki rang bad thei ïalehkai Kickboxing ki long u Hame Shaniah Suïam uba la ïoh khur artylli ki takma ka takma ksiar bad takma rupu, ka Nisanshwa Lyngdoh bad u Bantei Sungoh mar kawei ka takma bad kiwei kiwei.

Ïaka jingïalang la pynïaid da u Forme Bina bad la ïoh ka jingkren lamkhmat na u President BAM JH u Yoosar Kynjing, na u President Central Body u June Kharbuli, u Adiviser u Iahmi Khyriem bad kiwei kiwei haka jingïalang kaba la long ha Infinity Hall, Mooralong, Jowai.