Da ka jingiaid paidbah yn pynlong ha Mynsngat ban dawa pynshitom iaki runar ba pyniap ia u Pynkhreh Surong

Syllad | The Rising MeghalayaMarch 28, 2023

Ka Joint Action Committee Nartiang Khanduli Circle kaba kynthup iaki waheh shnong, sengbhalang, ki nongniah kali kamai Tourist bad ka shnong Mynsngat, Murap kin pynlong iaka jingiaid paidbah haka 30 tarik Lber halor ka jingshah pyniap u Pynkhreh Surong ha ki runar na ka bynta ban ioh die iaka kali jong u.

Kane ka rally ka JAC Nartiang Khanduli Circle ka dei shi bynta ban pynrem iaki runar nongpyniap briew bad ban dawa na ka bor jong ka aiñ ban set phatok shi jingim ia kine ki runar kynthup ia u para u I Love You, u Meban Talang uba na Moorap bad u Sambun Dkhar na Mynsngat kiba la shah kem ha ki pulit halor jingsuba donkti ia kane ka kam.

Ka Committee kala ong ba kane ka rally kan sdang na Dongiurim bad yn pynkut ha iew Mynsngat da ka jingialang paidbah bad la khot la wer ia ki paidbah, ki sengbhalang, synjuk niah kali ban iasnohktilang ha kane ka rally.