Da ka jingiaid paidbah yn pynlong ka NEHUSU haka 26 tarik Risaw ban dawa leh ei ei halor kiba bun ki mat

Syllad | The Rising MeghalayaOctober 25, 2023

Ka seng ki samla pule North Eastern Hill University Students’ Union (NEHUSU) kan pynlong ia ka  jingiakhih da ka jingiaid paidbah lashai ka 26 tarik Risaw ban dawa ia ki bor pyniaid ka University ba ka dei ban leh eiei noh halor kiba bun ki jingdonkam bapher bapher kiba iadei bad ki samla pule.

Ha kaba iadei bad kane ka bynta na ka liang u president ka NEHUSU u samla First June Nongbsap ula ong ba na ka liang ka Union ka kyrpad ia baroh ki samla pule bad ki seng kiba don hapoh ka Univeristy ba kin iasnohkti lang ha kane ka jingiakhih bad ban ym iashim bynta ne boycott ruh ban shong klas.

Haba kren halor ki mat, na ka liang u samla First June ula ong “Halor ka kam hostel, ngi dawa ban pynjanai ha ka rukom ai ia ki jingbam ba bha, ban pynioh wifi bad kiwei ki jingdonkam na ka bynta ka jingshngain bad na ka bynta ban pynsuk ia baroh ki nongsah hostel”.

Nalor kata u la  pyntip ruh ba kane ka jingiaid paidbah kan sdang na Central Library sha Administrative Block.

Nalor kata u la ong ruh ba ka Seng ka dawa ruh na ka bynta ban buh noh ia ka Library ba kyrpang na ka bynta ka School of Technology (SOT), bad ruh ban long shai bad khuid ha ka jingai marking system ia ki samla pule bad kiwei kiwei.

Ha kaba iadei bad ka jingthungkam ia u Rohit Prasad, na ka liang u President ka NEHUSU ula ong “Ngi sngewkhia halor ka jingthung ia u Rohit Prasad sha ka ophis jong u Vice Chancellor. Ka jingbym long shai ha ka rukom thungkam bad ki kyndon ban thungkam ia une u briew ka dei ka kam kaba ngi dawa ban tuklar mardor”.