Da ka jingïakop pyni nam syntiew pynlong ka BMC Ratacherra

Syllad | The Rising MeghalayaNovember 16, 2021

Da ka jingthmu ban pynshlur ïaki nongshong shnong ban ri bad sumar ïaki syntiew ki skud kiba pynitynnad ïaka ïing ka sem bad ki sawdong sawkun ka shnong ka thaw, ka Bio-Diversity Management Committee (BMC) jong ka shnong Ratacherra, East Jaintia Hills haka sngi Saitjaiñ ka la pynlong da ka jingïakop pyni nam ïaki syntiew ne Flower Show Competition.

Ïaka jingïakop la pynlong ha phyllaw ka Govt. LP School, Ratacherra haka jingïadonlang u kongsan u Chairman ka shnong Moolamylliang u Damewanhi L. Rymbai uba long ruh u dkhot ka Meghalaya Bio-Diversity Board, u Waheh shnong barim u Ma Khamsngurbha Pohïing, u President VDP u Ma Pynkhlaiñ Dhar, ka President VO Ratacherra ka Kong Suda Pohthmi, ki nongkitkam shnong bad ki katto katne ngut ki nongshong shnong.

Haka jingïakop ki nongshong shnong kila wanrah ïaki syntiew ki skud bapher ba ki la thung kyrpang haki khiew syntiew.

U Chairman ka shnong Ratacherra u ma Faires Pohshna haka jingkren maitphang ula ïathuh ba ka jingpynlong ïaka jingïakop ka long shibynta ka jingpynshlur ïaki nongshong shnong ba kin ri bad sumar ïaki syntiew ki skud bad ban ïada ïaki syntiew kiba don haki khlaw ki btap kaba long shibynta ka jingïada ïaka mariang.

U Damewanhi L Rymbai kum u kongsan haka jingkren ula ïaroh ïaka BMC jong ka shnong Ratacherra kaba la lah ban pynïaid shakhmat ïaka jingpyni nam. Ula kyntu ruh ïaki nongshong shnong ban thung khambun ïa kino kino ki jait syntiew khamtam u tiew dieng (Wild Orchid) namar udei u jingthung uba rem dor bad lah ban kyntiew ïaka ïoh ka kot jong ki nongshong shnong.

Ula ong ba kam rep syntiew kadei kawei na ki lad kaba ai kam ai jam ruh iaki briew ban im jakpoh, kumta ula banjur iaki nongshong shnong ban phai khmat sha kane ka kam.

Ula kyntu ruh ïaki nongshong shnong ban pyntreihok ïaki skhim sorkar khamtam ka skhim bylla 100 sngi ne ka Mahatma Gandhi National Rural Employment Guarantee Scheme (MGNREGS) namar kadei ka skhim kaba kyntiew bad pynroi pynpar ïaka shnong.

Hadien ka jingïalang la sam ïaki khusnam shaki nongjop ha kaba ïaka nam kaba nyngkong la ïoh da ka Kong Fedelity Dhar, ba Ar ka Kong Dayamon Mynteng bad ba Lai la ïoh da u Ma Lang Shadap.

La sam khusnam ruh ïaka dong Newhill da ka khusnam bakhuid tam hapoh ka shnong.