Da ka jingïakop siat khnam pynlong ka KKC Seinraij bad KNIKMS ban rakhe iaka sngi iap U Kiang Nangbah
Kum shibynta ka jingrakhe kynmaw burom iaka lyngkhuh sngi ïap ba 160 snem U Kiang Nangbah khlawait ka rilum Jaintia, ka Khynroo Khyllood Committee (KKC) Seinraij Jowai bad ka Kiang Nangbah Ïasiat Khnam Memorial Society (KNIKMS) haka sngi ba ar kila pynlong ïaka jingïakop siat khnam ha madan madiah Kmaiblai, Syntu Ksiar.
La wan shim bynta da ki khynnah bad rangbah na kylleng ha kane ka jingiakop.
Haka jingiakop kaba la pynlong da ka KNIKMS, u Dapsming Kynjin ula ïohrah ïaka nam lahduh, ba ar u Lamet Phawa haka jingiakop siat para marwei, haka jingiasiat mar arngut u Lamet Phawa bad u Carlin Phawa ki la ïohrah ïaka nam lahduh ba ar u Dapsming Kynjin bad u Budlangki Lakiang.
Haka jingiasiat khnam hapdeng ki khynnah u Lan Phawa ula ïohrah ïaka nam lahduh ba ar u Oni Dkhar. U Lemanki Shylla bad u Haunisa Kynjin ki la ïohrah ïaka nam lahduh ba ar u Oni Dkhar bad u Wan-i Dkhar haka jingiasiat mar angut.
Katba haka jingiakop kaba la pynlong da ka Khynroo Khyllood Committee Seinraij Jowai, haka jingïakop siat khnam marwei (Single) ïaka nam lahduh la ïoh da u Win Lhuid na Ialong ba ar u Yoochwa Lamin na Jowai.
Haka jingïakop siat khnam double ïaka nam lahduh la ïoh rah da u Dapsming Kynjin bad u Budlangki Lakiang na Panaliar ba ar da u Baitmi Shylla bad u Hauni Kynjing na Panaliar.
Na ka liang ki bor pynïaid jong kane ka jingïakop ki la pynbna ba ïaka khusnam sha ki nongjop yn sam haka 30 tarik Nohprah haka jingïalang kynmaw burom ïaka lyngkhuh snem ïap ba 160 u Kiang Nangbah ka ban long ha Madan Mynkoi Pyrdi Iongpiah ba la pynïaid da ka Seinraij Jowai bad ha Madan Madiah Kmaiblai haka jingpynïaid ka Kiang Nangbah Iasiat Khnam Memorial Society, Jowai.
Facebook
Instagram
Youtube
Twitter
Leave a Reply