Da ka jingialehkai phutbol ialap ka Ratacherra CSC halor ka jingsniew u drok bad kyiad

Syllad | The Rising MeghalayaDecember 16, 2023

Namar ka jingjyllei palat u drok hapoh ka jylla bad ba ki samla kin long phikir lypa na ka jingsniew ba mih na u drok bad ruh na ka kyiad, ka Ratacherra Cultural & Sports Club ryngkat ka jingiatreilang ka Dorbar Shnong, ki la pynlong da ka jingialehkai kaba tip kum ka Ratacherra 9-A-Side Football Knock-Out Tournament ryngkat ka phang “Say No to Drugs & Alcohol”.

Ha kane ka jingialehkai la shim bynta 16 tylli ki kynhun kiba don hapoh ka Shnong bad haka 15 tarik Nohprah kane ka jingialehkai ka la poi noh shaka jingiakhun phainal ha madan phutbol jong ka Shnong Ratacherra, East Jaintia Hills District.

Haka jingiakhun phainal ka Lumtrom-B kala pynliem iaka Lumtrom-A da 4-3 lyngba ka jingiashut Tie Breaker hadien ba ka jingialehkai kaba la buh por ban iakhun, ka la kut noh da ka jingiakhait kaba mar 1-1.

Iaka kol jong ka Lumtrom-B la thep da u Remind Mylliem haka minit kaba 21 katba iaka kol jong ka Lumtrom-A la thep da u Gradely Mylliem haka minit kaba 30.

Hadien ka jingialehkai u kongsan u Ma Diamborlang Pohshna Assistant Head Teacher Wellington Jungai Memorial Secondary School, Ratacherra ula sam khusnam sha ka kynhun lahduh bad kynhun ba wan ba Ar.

Nalor u kongsan, la donlang ruh u waheh Shnong u Ma Pynkhlainbor Dhar, Secretary Shnong u Ma Bujli Sumer, ki nongkitkam Shnong bad kiwei kiwei haka jingialang kaba la pyniaid da u Ma Kyrpang Sumer.