Da ka jingiathir jingmut pynlong ka Rotary Club Jowai halor ka jinghiar kyrdan ka jaidbynriew Khasi Jaintia

Syllad | The Rising MeghalayaDecember 11, 2022

Ka Rotary Club Jowai ka la pynlong ïaka jinglang ia phylliew jingmut halor ka phang “Ka daw bah daw san ka jinghiar kyrdan ka Jaitbynriew Khasi-Jaintia haka juk kaba mynta ha kiba bun ki liang” kaba la pynlong ha auditorium hall ka Kiang Nangbah Govt College haka sngi Saitjaiñ.

La khot kyrpang ïaki samla pule jong ka Kiang Nangbah Govt. College, Jowai bad ka Thomas Jones Synod College, Jowai ban ïashim bynta haka jingai jingmut ryngkat ka jingdonlang ki Waheh Shnong, Secretary Shnong bad kiwei.

Ka Professor Streamlet Dkhar, Former Dean, School of Humanities NEHU & President Indian Council of Social Welfare, Meghalaya State Branch bad ka Bakhianmon Rynjah, Associate Professor Sankardev College Shillong kila donlang ha kane ka prokram.

Ïaka jingïalang la pynïaid da u Rtn. Samehi Laloo, President Rotary Club Jowai bad la ïoh ka jingkren na u Rtn.J.M.Pohsngap (PHF) Past President RC-Jowai, u Rtn. S.K.Lato, Director Community Service, RC-Jowai bad u Rtn. Ruevene Nongtdu (RFSM).

Haba shim bynta haka jingai jingmut ki samla pule ki la pynsngew ïa la ka jong ki nia bad nongrim da kaba pynwan dur ïaki jingkren haki bynta ki rukom bapher bapher kynthup ka jinghiar dor naduh na ïing na sem, ka imlang sahlang ka bym don shuh ia kata ka jingkitkhlieh iaka miat ka bha ka shnong ka thaw bad ki nongshong shnong, ka jingbud tynneng bad ka jingbymskhem shuh kata nongrim longbriew manbriew kaba la pynhiar ar sut iaka roi ka par bad ka jingnang jingstad.

Hadien ka jingpashat jingmut na ki samla pule, la ïoh pat ka jingpashat jingmut na ki nonghikai halor ka phang “Ka jinghiar dor ka ri bad ka Jaitbynriew” ba la shim bynta haka jingkren da ka Renda M.Khonglah, Asst. Professor Khasi Department, Thomas Jone Synod College, Jowai, u Rimiki Lada Nanghuloo, Asst. Professor Physic Department, Kiang Nangbah Govt. College Jowai, ka Bakhianmon Rynjah Rynjah, Associate Professor Sankardev College Shillong bad ruh na ka Professor Streamlet Dkhar.

Ki nongbishar kiba la wan ban bishar ïaka jingkren ki samla pule jong ki artylli ki kolej ki long u Riquoma Rq. Laloo, Headmaster Tep Kyndait School Tuber, u L Lyngdoh, Jt. Director DSEL, West Jaintia Hills bad u R Lamar, Retired Principal Williamson Sangma Govt. College, Tura.

Ïaka nam Best Speaker la ïoh rah da samla Osmond Suchiang, ba ar u Kynjailang Salahe baroh ar kidei na ka Kiang Nangbah Govt. College Jowai Kiang bad ba lai u Quickly Pala, Thomas Jones Synod College, Jowai.