Da ka jingkyrmen mih leit aireng ka kynhun naka Jylla ha ka final round jong ka Santosh Trophy

Syllad | The Rising MeghalayaDecember 10, 2024

Ka kynhun ialehkai phutbol ka jylla ka la mih biang na ka nongbah Shillong ryngkat ka jingkyrmen ban lah ban pynurlong ia ka jingthrang bad ka jingangnud jong u paidbah ba kin wanphai iing ryngkat bad ka nam lahduh na ka lympung ialehkai final round jong ka Senior Men’s National Football Championship for the Santosh Trophy 2024-25, ka ban long ha Hyderabad ha kane ka taiew.

Ha kane ka kynti, ia ka kynhun ialehkai ka Meghalaya la pyniakap ia ka ha ka in Group B ba don lang kiwei pat ki jylla ba la paw bad ba khlain bha ha ka ri kum ka Goa, Delhi, Kerala, Tamil Nadu bad ka Odisha.

Ha kane ka kynti, ka jingiakhun ba nyngkong ka Meghalaya kan long ha ka 15 tarik mynta u bnai pyrshah ia ka Tamil Nadu, ka ban long ha ka por 2:30 nohphai sngi ha madan jong ka Hyderabad’s Deccan Arena. Kat kum ka kyndon pyniaid tang ki saw tylli ki jylla kiba bat ia ki kyrdan ba kham shalor kin ioh ban iakhun ne rung sha ka quarterfinal, kaba ha kane ka kynti, la sngewthuh ba kum ka kynhun ka la angnud shisha ba sa shisien kan lah ba kan ialehkai bha kumba ka la lah teng ha ka samoi ialehkai u snem 2022-23.

Lah ban pynkynmaw ba ka Meghalaya ka la lah ba kan jam shakhmat ha kane ka kynti iakhun kaba mynta, hadien ba ka la lah ba kan bat ia ka kyrdan kaba halor duh na ka Group E jong ka preliminary round ne ka kylla kaba nyngkongkaba dang shu dep ban long sha kane ka thain ha Nalbari, Assam.

Ha kane ka kynti, la coach ia kane ka kynhun da u coach uba la paw ka  jylla u bah Hering Shangpliang bad kapten ruh ia ka da u player ba la ih bha ka jingim ialehkai  u Fullmoon Mukhim.

Kumta ha ka 9 tarik Nohprah shwa ba kane ka kynhun kan mih biang na la iing, kala don ka jingialang kitbok kitrwiang ha kaba la wan ban don lang da u president ka Meghalaya Football Association u bah Hamletson Dohling, General Secretary u bah Sunesh Syiem, Vice-President Cliff Nongrum and Treasurer Prosper Warjri.

Ha ka jingkren u bah Hamletson u pynpaw ba ka long ka burom kaba khraw ia ki player ban mihkhmat ia ka jylla, ha kaba u la ong ruh ia ki player ba ki da don ruh ia ka jingkyrshan kaba radbah na u paidbah jong ka jylla, da kaba u la bynrap ba ka jylla ka shaniah tylli ha ki rang ialehkai kiba mynta ba kin lah ban wanphai sha la iing ryngkat bad ka nam kum ki lahduh.

U bah Sunesh Syiem u pynpaw ba la shem bad iohi ia ka mynsiem bad ka jingtrei shitom jong ki player ha kaba u la ban jur pat ba donkam ban iai bteng ban don ia kum kane ka mynsiem ryngkat ka discipline.

Katba na ka liang u kapten jong ka kynhun u Fullmoon Mukhim uba la kapten ruh ia ka kynhun hadien ka jingshah rem noh da 3-2 hakhmat ka Karnataka ha ka samoi ialehkai u snem 2022-23, u kam ba kum u nongialam bad baroh ki player ba don ha ka kynhun ki kut jingmut ba kin ialehkai bha bad ban wanrah ia ka nam bad burom ia la ka jong ka jylla.

Ki kyrteng ki player:

Goalkeepers – Siwel Rymbai, Rajat Paul Lyngdoh, Lambhamiki Lamare

Defenders – Wanboklang Lyngkhoi, Aibiangmame Nongneng, Donborlang Nongkynrih, Overkindness L Mawnai, Badondor Marbaniang, Banraplang Pyngrope, Arlangky Nongsiej

Midfielders – Baiaikara Swer, Wilbert Marbaniang, Fullmoon Mukhim (C), Damanbhalang Chyne (VC), Fairming Suting, Dibormi Kassar, Kevin Rymbai, Robertson Khongriah

Forwards – Donlad Diengdoh, Deibormame Tongper, Khrawkupar Jana, Owanijuh Pajuh

Support staff – Hering Shangpliang (Head Coach), Dapmon Tariang (Assistant Coach), Amit Rai (Goalkeeping Coach), Freddy Kharpran (Manager), Baiainehlang Bareh (Physio), Teiborlang Dohling (Official).

Ki sngi ban ialehkai:
Meghalaya vs Tamil Nadu, ha ka por 2:30 mynsngi ha ka 15 tarik u Nohprah
Meghalaya vs Kerala, 7:30 mynmiet haka 17 tarik u Nohprah
Meghalaya vs Delhi, 2:30 mynsngi ha ka 19 tarik u Nohprah
Meghalaya vs Goa, 2:30 mynsngi ha ka 22 tarik u Nohprah
Meghalaya vs Odisha, 9 mynstep ha ka 24 tarik u Nohprah.