Da ka jingshaniah tylli ha U Blei kyrmen ka iing ka sem Bah Tiklu ba ka kynhun kan wanphai suk na u lum thah na Uttarakhand

Syllad | The Rising MeghalayaOctober 5, 2022

Ka longiing long sem kaba kynthup naduh ka lok lem bad ki arngut ki khun, nangta u kynum, I kiaw bad ka iing ka sem jong bah Tiklu Jyrwa, ki iai ap khmih lynti ia ka khubor kaba bha ba kin ioh pdiang, hadien ba une u samla rangbah, u dei uwei na ki 40 ngut ki nongshah pyntbit ha ka kam ban kiew lum, kiba dang jah bad bym pat shym la lah ban ioh ban pyllait im ia ki, na ka daw ka jingtwa jong u thah jong u uwei u lum ba don ha ka jylla Uttarakhand.

Kane ka jingjia hap lum thah kala kala jia haka sngi ba Ar, shi kynhun ki nong kiew ba don kumba 41 ngut, kiba don hapdeng ka jingleit ban pyntbit ha ka shlem ai jinghikai jong ka Advance Mountaineering Course, ka Nehru Institute of Mountaineering (NIM), Uttarkashi ki la shah tyllep bad rong noh ha ka jingtwa jong u thah ha u lum Draupadi  Ka Danda uba jrong kumba 5,771 m (18,934 ft).

Ha kane ka kynhun u bah Tiklu Jyrwa ba la don 35 snem ka rta ba shong ba sah ha  Mynsaiñ, Lumparing, Shillong, u la don lang bad kane ka kynhun, kaba haduh ba la pynmih  ia kane ka khubor, ka kynhun ki shipai jong ka ri ki dang pynlong ia ka jingleit ban wad bad ban wanllam ia kane ka kynhun ba dang sah kut ha une u lum sha ka kad  treikam jong ka kynhun ki shipai Indo-Tibetan Border Police (ITBF) kaba don ha Uttrakhand.

Haba iadei bad  kane, u Syllad u la leit ban ia kynduh ia u kynum bad kumjuh ia ka kurim jong bah Tiklu Jyrwa, kata ia u bah Wallambok Lyngdoh ba dei artad u General Secretary jong ka Meghalaya Sport Climbing and Mountaineering Association (MeSCMA) bad kong Indalin Lyngdoh Marshilong, kiba iai a pia ka khubor kabab ha bad ruh ban pdiang ia ka jingwan phai iing da kaba suk jong bah Tiklu.

U Bah Wallambok u iathuh ba kane ka kyhun kaba 41 ngut ba don lang u kynum jong u bah Tiklu, katba ki dang leit ban kiew ia une u lum Draupadi Ka Dhanda bad kane ka jingkiew ka dei hadien ba ki la pyndep ia baroh ka training.

Phewse dei ynda haba ki la khreh ban wanphai na ka jaka ba ki la dep ban kiew ia une u lum, la ong ba san kynsan  ka la jia ka jingtwa noh ka jong u thah (avalanche), ha kaba kane ka kynun ki la sahkut noh shalor une u lum.

Shuh shuh bah Wallambok u iathuh ba wat lada kane ka kynhun ka pyrshang ban wan hiar shapoh, hynrei kim shym la lah satia ban leh kumta, hadien ba ka don ka jingkah kaba jur jong u lyoh bad dei kane kaba la buh jingeh ia kane ka kynhun u kynum u jong u ban lap ne shem biang ia ka lynti iaid.

Kane ka jingjia kadei kaba la jia ha ka por 8:45 baje mynstep bad n aka liang ka iing haduh mynta mynne kim pat shym la ioh khubor shuh, hadien b aka kyhun kaba leit ban pyllait im  ruh, hynnin hi ka sngi kim shym la lah ban pyndep ia ka kam hadien ka jingsniew  ka suin bneng bad jingdum u lyoh.

Dei tad haduh hynne ka step, ba ka kynhun ban pyllait im ia kine ki nongkiew ia une u lum, ba ki la pyrshang ban kiew da ka kjat bad ban wad ia ki briew kiba la sakma lynti ha ki bynta jong une u lum.

Haba jubab halor ka jingkylli la u bah Tiklu u la pyndep ne shah pyntbit ne em haka jingim ban kiew ia kum kine ki lum, u bah Wallambok, u ong ba u kynum u jong u, kata bah Tiklu u la pyndep ia ki jinghikai ne leit ban pyntbit, namar u iathuh ba kum ki nongkiew lum, ka kamram hi jong baroh ka long ba kin hap ban pyndep haduh san tylli ki mountaineering course, ha kaba u bah Tiklu kane ka dang dei ka sien pyndep kaba ar ia ka course. 

Pynban wat lada u bah Tiklu u dang pyndep tang arsien, pynban na ki jingpyrshang kiba u la pyndep baroh, kum u samla, u long pat u briew uba pnah ba shlur bad ba don bha ka sap ha kane ka jait kam la ong u bah Wallambok.

U Bah Wallambok u ong ruh ba kane kan dei ka sien ba nyngkong ha ka history jong ka kam ai jinghikai kiew lum, ba kum kane ka jingjia kan wan ba kan jia ia ka kynhun ki nongkiew lum ka ri khamtam ha ka por ba ki dang don hapoh ka prokram shah pyntbit (training).

Halor ka jingkyrmen ia kane ka kynhun ba la don lang u bah Tiklu, u bah Wallambok, wat ialade u la dei uwei na ki nongkiew lum ba la paw ba la pyntbit bha ha kum kane ka jait kam, u pynpaw ba ha kum kane ka khep bad kynti kaba mynta, u ruh shimet u shaniah tylli ha la ki paralok kiba la don bynta bad ka kynhun ban leit ban pyllait im ia kane ka kynhun.

“Ka jingshaniah kaba kham bun ka dei h U Blei bad dei tang ha ka bor ka jong u kaba lah ban aibor ai mynsiem ia kane ka kynhun kaba dang sah kut ba kin lait na kino kino ki jingeh, ki jingma ha kum kane ka khep ka kynti kaba ki mad mynta ha ka jingim bad kyrpad ruh ia ki briew kiba pule ia kane ka khubior ba kin iarap lem ban buh ia ka jingduwai ia kane ka kynhun” la ong u bah Wallambok.

Na ka liang ka kurim kong Indalin Lyngdoh Marshilong, I pynpaw ba ma I ruh I shu shaniah ha U Blei bad ha  kiei kiei kidei ka jingpyniaid jong u, uba najrong, bad kyrpad ia ki paidbah ba kin sngewbha ban buh lem ha ka jingduwai ia u kurim u jong I bah Tiklu, nalor kata I la ai khublei ia ka sorkar kaba la shim khia ia kane ka jingjia.

Ka sien iakren lyngba ka phone hapdeng kine ki arngut ka dei ha ki khyndiat kynta kaba u bah Tiklu ba dang don hapoh base camp, katba u dang khreh ban kiew noh ia une u lum, kaba hangne u la pyntip ia kong Indalin ha kaba u la ong ia I ba ynda ba la poi kham shalor u lum bad kular ba marsien wan hiar pat na une u lum ba u la kiew un sa phone biang pat sha iing bad kum ka iing haduh kane ka khyllipmat ki iai ap khmih lynti lano pat ba bah Tiklu un phone biang sha la iing kumba u la kular.