Da ka jingsngewthuh jingmut bad ka jingjai jai ban pynbeit ia u pud u sam ka Assam Meghalaya: Dr. WR Kharlukhi

Syllad | The Rising MeghalayaSeptember 15, 2022

U MP Rajya Sabha na ka jylla Meghalaya u Dr WR Kharlukhi haka sngi Balang u la ong ba ka Sorkar Kmie kan hap ban tuklar ban pynbeit ia ka jingiakajia khappud hapdeng ka Assam bad ka Meghalaya lada kitei ki artylli ki jylla kim lah ban poi sha ka jingiasngewthuh jingmut hapdeng jong ki.

U Dr Kharlukhi u la iathuh ia kane ha ka jingialang paidbah bala pynbeit da ka Labang Nongphyllut People Council (LNPC), u MDC ka Barato Mukroh U Ma Aiborlang Shadap bad ka Seng HBDRF ha Shnong Barato.

U MP Rajya Sabha u la kyntu ia ki paidbah jong ka thain Block-I ba ki dei ban pyrshang ban pynbeit ia ka jingiakajia khappud da ka jingsngewthuh jingmut bad da ka jingjai jai.

Ha kawei ka pat ka liang, u General Secretary jong ka Jaintia Students Union Seng Kmie u Treiborlang R Suchen u la kyntu ia ki paidbah jong ka thain Block-I ba kin long kiba la pynkhreh lypa na bynta ka jingwan iuhkjat jong ka Regional Committee sha ki thain jong ki ha ka jingpynbeit mut ha kane ka Second Phase.

U la iathuh ba ka Seng JSU ka la shimkhia ia kane ka kam kajia khappud bad ka la dep wan iakynduh ruh ia u Secretary jong ka tnat pohiing jong ka Sorkar Jylla ban kyntu ia ka Sorkar Jylla ban pynthikna ba ki shnong Pnar hapoh Block –I ba ki dei ban wanphai noh sha ka jylla Meghalaya.

U Secretary jong ka Synjuk Ki Rangbah Shnong Border Area Raid Nongtung u Bah Aloysius Bina u la iathuh ba ka jaka jong ka Block-II ka kham heh kham iar ia ka Block-I hynrei mynta ka Synjuk ka dawa ia ka jingpynphai noh jong 18 shnong hapoh ka Raid Nongtung jong ka Hima Khyrim kiba hap hapoh Block-II sha ka Jylla Meghalaya.

U la ong ba kitei ki shnong Khasi ha Block-II ki iakynduh jingeh kumba iakynduh ki Pnar ha Block-I namar ka Karbi Anglong Autonomous Council (KAAC) ka ju dawa khajna na ki haba ki kit synsar bad sying ban leit die sha Bhoirymbong.

U Bah Bina u la iathuh ba ki pulit Assam ki juh pynthut ia ki haba ki pyntreikam ia ki skim shispah sngi bad ki pulit Assam ki la pynpra ia ka iingskul SSA kaba don ha Shnong Khlieh Umwang bad mynta ki don tang san tylli ki skul SSA ha ka thain jong ki.

U la iathuh ba ha kitei ki 18 tylli ki shnong Khasi la wan buhai shnong lang ki Nepali bad ka jingdon  ki ha katei ka thain ka la nang kiew namar ka jingpynshlur jong ka KAAC kaba ai jingiarap ia ki bad ka KAAC ka pynkup bor ia ki nongialam jong ki kum ki Sorkari Goanburra ne ki Rangbah Shnong bala siew tulop da ka KAAC.

Shuh Shuh na kaliang u Secretary jong ka Labang Nongphyllut Pangam Raliang Area Committee (LNPRAC) u Ma Philip Talang u la iathuh ba ki don kumba shiphew hajar ngut ki Pnar ha ka thain Block-I bad ki kwah ba ki shnong Pnar kin wanphai noh sha ka Jylla Meghalaya.

U Secretary jong ka LNPC u Ma Markos M Thaiang u la kyntu ia ki paidbah ba ki dei ban long kiba shlur ha ka jingwan jngoh jong ki ophisar na Assam wat la da ia ki la synran lang da ki pulit kiba kieng aktiar bad ki dei ban pynpaw ia ka jingangnud jong ki ban wanphai noh sha Meghalaya.

Ha kane ka jingialang la iawan shim bynta da ki Waheh Shnong jong ki shnong bapher bapher ha Block-I ryngkat ba ki nongshong shnong bad baroh na ki la pynpaw ia ka jingangnud jong ki ban wanphai noh sha ka Jylla Meghalaya.