Da ka kali aiti ka Meghalaya Assembly ban pynkhlain ha ka jingiakhun ia ka HIV/AIDS

Syllad | The Rising MeghalayaApril 11, 2025

Ha ka sienjam kaba kongsan ban pynthikna ia ka jingshakri kaba kham bha ha ka jingiakhun ia ka jingpang HIV AIDs ha kylleng ki jaka jong ka Jylla Meghalaya khamtam sha ki thain kiba pajih bad ba kyndong tam, ka Meghalaya Legislative Assembly ka la aiti ia ka kali Mahindra Bolero sha ka Meghalaya AIDS Control Society (MACS).

Ia kane ka kali la aiti sha u Dr. Wallambok Langstieh, Project Director of MACS bad kiwei pat ki ophisar da u Malthus S Sangma, Additional Secretary ka Meghalaya Legislative Assembly uba la mihkhmat ha ka jaka jong u Thomas A Sangma u Lamphang ka Meghalaya Legislative Assembly.

U Lamphang u la shimkhia na ka bynta ban pynkhlain ia ki lad jingshakri ha ka jingiakhun pyrshah ia ka HIV/AIDS ha ka jylla bad u la shim ia ka bynta kaba kongsan ban pyniaid shakhmat ia kane ka sienjam.

Ia kane ka kali yn sa aiti noh sha ka Meghalaya State Network of Positive People (MSNP+), ha kaba yn pyndonkam ha ka ban wad bad buddien ia ki briew kiba hap ha ka kyrdan Loss to Follow-Up (LFU). Nalor kata kan kyrshan ruh na ka bynta ban pyndonkam ha ki prokram pynshai paidbah ha kylleng ka jylla.

Yn shna ka Sorkar da ka Addict Treatment Facility ha Umsawli ban sumar ia kiba dih drok

Haba ai jingkren hadien ka jingaiti ia kane ka kali, u Malthus S Sangma u la ong, “Mynta ngi la aiti ia kane ka kali Mahindra Bolero sha ka Meghalaya AIDS Control Society ha ka jaka jong u Lamphang. Nga dap da ka jingsngew burom ban ioh ban aiti ia kane ka kali sha ki ophisar ka MACS. Kane ka dei ka jingangnud kaba la slem ban don ia ka kali ka ban lah ban leit sha ki thain nongkyndong, ban aijingshakri ia ki briew ia ka jingpang HIV/AIDS bad kiba mad jingeh ban ioh ia ka la jingsuma ha Shillong. Kane ka kali kan aijingshakri beit beit ha khyrdop iing na ka bynta kito kiba donkam, khamtam ha ki thain kiba pajih bad ki shnong kyndong.”

“Nga ngeit ba kane ka jingai kaba rit bad kaba don jingmut na ka liang ka Meghalaya Legislative Assembly hapoh ka jingbtin lynti bad ka jingsbun mynsiem jong u Lamphang kan iarap shibun ban aijingkyrshan ia ki riew shimet bad ka imlang sahlang ha ka jingiakhun pyrshah jong ngi ia ka jingpang HIV/AIDS ha ka Jylla,” u la ong.