Da ka kurim u Zenith yn pyniakhun ka TMC ha ka elekshon shiteng samoi ha Gambegre

Syllad | The Rising MeghalayaAugust 23, 2024

Ka All India Trinamool Congress (TMC) ka la shim ia ka rai ban pyniakhun da ka MDC ba marwei ka Garo Hills Autonomous District Council (GHADC) kum ka kyrtong ha ka elekshon shiteng samoi ha Gambegre Constituency, West Garo Hills.

Ha kajuh ka por u nongialam ka TMC uba dei ruh u Myntri Rangbah barim u Dr Mukul Sangma ula kynnoh ba ka National People’s Party (NPP) kala pyndonkam bakla ia ki bor Sorkar ban jop ia kane ka elekshon.  

Haba kren sha ki lad pathai khubor hynne ka sngi 23 tarik, u Mukul u la ong ba u president ka Pradesh Trinamool Congress Committee u Bah Charles Pyngrope bad ki dkhot ka election committee ki la dep ban shong bad iamir jingmut ha kaba iadei bad ka aplikeshon jong ka MDC ka party na Dengnakpara Sadhiarani M Sangma kaba dei ruh ka kurim u para jong u, uba dei ruh u MLA barim na Rangsakona u Zenith M Sangma. 

“Ka Committee ka la iamynjur lang ha ka jingshim rai ban phah ia ka kyrteng jong ka Sadhiarani na ka bynta ka jingmynjur kaba khatduh kum ka kyrtong ka TMC ha kane ka elekshon shiteng samoi na Gambergre. Kumta ngin ap ia ka jingmynjur jong ka Chairperson bad shen yn sa pynbna ia ka kyrtong,” u la ong haba bynrap ba ka party kala iaid shaid shaid ha ki jingtreikam hapoh ki shnong ki thaw ban ioh ia ka jingjop na kane ka constituency. 

Ka jingpynkhreh ban pynlong ia kane ka elekshon shiteng samoi ka la wan long hadien ka jingiehnoh kam jong u nongialam ka Congress u Saleng A Sangma hadien ba u la shah jied ku u MP ka Lok Sabha na Tura.  

Haba kynnoh ia ka party synshar NPP halor ka jingpyndonkam bakla ia ki briew sorkar, une u Myntri Rangbah barim u la kynnoh ba ka la don ka jingsam ia ki tin sop iing sha ki longiing hapoh kane ka constituency.  

“Nga la buddien ia ka jinglong jingman baroh hapoh ka constituency.Kawei kaba nga la sakhi ka long ba ka Sorkar ka la bthah ia ki nongtrei sorkar ba kin pynleit jingmut hapoh kane ka constituency, kata kynthup ruh wat u Myntri Rangbah ka Jylla,” u la bynrap.  

Haba pynpaw ba kane kam dei kaei kaei ruh hynrei ka jingleh kutlad jong ka NPP ban jop ia ka Gambegre, u Mukul u la ong, “Hynrei Nga ong ha phi ba ki paidbah kin ai ia ka jubab kaba biang.”