Da ka kynhun ba khlain pynkhreh ka KHNAM ban mih iakhun ia ka elekshon MDC sha KHADC

Syllad | The Rising MeghalayaDecember 13, 2024

Ka Khun Hynniewtrep National Awakening Movement (KHNAM) ka pyntip ba ka la pynkhreh da ka kynhun kaba khlain bha ban mih iakhun ha kane ka elekshon sha ka Khasi Hills Autonomous District Council (KHADC), ka ban long ha une u snem u ban wan.

“Ngi la pynkhreh ia ka kynhun kaba khlain bha, kaba don kawei ka rukom pyrkhat bad kawei ka thong ban pynthikna ba naduh u snem ban wan ngin sa iohi ia ka District Council kaba kham bha ha KHADC khnang ba ngin lah ban bat bad pynneh ia ki jingmut jong ka Sixth Schedule,” ong u Working President ka KHNAM u Bah Thomas Passah.

“Kumba long mynta, ka long kaba sngewsih shibun ban iohi ba ka District Council, kata la ka long ki EC ne ki MDC kim shym la lah ban treikam katkum ka thong jong ka Sixth Schedule. Na ka liang ka jong ngi, ngi dang pynkhreh bha ia ka plan halor kane,” u la bynrap.

U Bah Passah u dei napdeng ki phra ngut ki kyrtong ba la pynbna ban iakhun ha kane ka elekshon MDC ka ban wan na ka KHNAM na Jaiaw constituency.

Une u nongialam ka KHNAM u la ong ruh ba ka SEC mynta ka dang pynkhreh bad bishar ia ki kyrtong bad shen kan sa pynbna ia ka thup kaba ar jong ki kyrtong ki ban mih iakhuh ha kane ka elekshon MDC ka ban wan.

Da kaba pynpaw ba ka KHNAM ka dang wad ia ka kynhun kaba biang bha, u Bah Passah u la ong, “Ngi la dep ban kyntait ia 2-3 ngut ha ka kylla kaba nyngkong.Ha ka kylla kaba ar, ki kyrtong kiba la pan tiket lada ngim iohi ia kata ka jinglong , ka jingthmu bad ka mynsiem ban trei katkum ka jingthmu jong ka party bad ka ban pynthikna ba ngin wanrah ka jingkylla ha ka District Council, kito ki kyrtong ruh kin shah kyntait noh.”

Haba kylli, u Bah Thomas u la ong lada don ki kyrtong kiba biang ka long kaba thikna ba ka party kan pynieng ha baroh 29 tylli ki constituency hapoh Rilum Khasi.

Shuh shuh une u nongialam ka KHNAM u pyntip ruh ba shen ka seng kan sa wan ha ryngkat ki mat treikam jong ka kiba ka la bteng ban pynpaw bad tied ia ka jingkhang jong ka District Council mynta la bun bun snem.