Da ka kynhun ba thymmai dang wad ka jylla ban khreh tei ia ka Shillong Medical College: James

Syllad | The Rising MeghalayaSeptember 14, 2022

U Myntri ba dei khmih iaka tnat ka koit ka khiah ha ka jylla u James PK Sangma, u la pyntip hapoh ka iing dorbar thawain ba ka sorkar jylla ka dang khreh ban iakren bad pynbeit bad sa da kiwei pat ki kynhun kiba thymmai naka bynta ka jingsdnag ban tei ia ka Shillong Medical College.

“Ka sorkar ka dang pyrshang ban wad ne thaw ia ki lad ki lynti khamtam lei lei ha ka liang jong ka Public-Private Partnership (PPP) ne wat ban pan ruh ia ka jingkyrshan na DEA-NITI Aayog, jong ka sorkar India” la pynpaw u James .

Ha ka jingshisha, ia u maw nongrim jong ka jingtei ia kane ka shlem ai jinghikai, la dep ban plie  ha ka jaka jong ka  RP Chest (TB) Hospital kaba la wan hadien ba la dep ruh ban soi iaka soskular treikam bad ka kynhun ka KPC ha u snem 2012.

Pynban na ka liang u james, u la iathuh ba hadien kane, ka sorkar ka la ioh ia ka lad ba kan bhah ia ka jaka kaba don kumba 50 akar ha  New Shillong Township ban tei ia ka SMC, kaba la wan hadien baka jingthmu kaba nyngkong kam shim la long kaba  biang, la pynshai u James ia ka jingkylli bynrap u MLA ka North Shillong u bah Adelbert Nongrum.

Shuh shuh u James u la ong ba ka jaka ha RP Chest Hospital kaba don ha Mawbah ka bun jingeh bha, naduh ka lynti iaid ban rung shapoh kane ka jaka ka long kaba khim bad kaba lah ban buh jingeh hadien  habud bad nalor katta kumba ka long, kane ka jaka hi  ka la long kaba khapngiah kaba lah ban ktah ia ka rukom treikam treijam jong kane ka kolej.

Pynban ia kane ka rai ka sorkar ban kynriah noh ia ka SMC na ka jaka ba la buh ia u maw nongrim sha New Shillong Township, kam shym la pynsngewtynnad ia u MLA ka West Shillong u bah Mohendro Rapsang, uba la dawa ba shisien haba la  buh ia u mawnongrim ha kane ka jaka, da kumta kane ka kolej ruh ka dei ban tei beit ia ka hangne.

Haba iashim bynta lang ha kane ka jingiakren, u MLA ka Umroi u bah George B Lyngdoh u kwah ban  tip ba don daw aiu sha lyndet ia ka rai ban pyndam noh ia ka PPP bad ka kynhun jong ka KPC, bad ka jubab na u  James ka long ba ka daw ka jingweng ha kato ka por dei na ka jaka, ha kaba u la ong ba ka KPC ka dang kwah shuh shuh ka jaka na ka bynta kane ka kolej bad ia ka jinglong trai ba shipor (lease) ka kwah ba kan pynjlan  na ka 30 snem sha ka 99 snem bad bynrap bad ka jingkyntiew ia ka jingsiew.