Da ka kynhun SIT ban tohkit ïaka kam khaïi kynthei ha Jaiñtia Hills

Syllad | The Rising MeghalayaJune 6, 2019

JOWAI: Ka tnad Pulit jong ka West Jaiñtia Hills District kala thaw da ka kynhun Special Investigation Team (SIT) ban tohkit bniah halor ka jingkhaii ïaki kynthei khynnah sha ka kam awria.

U Superintendent of Police West Jaiñtia Hills District, Bah Lakador Syiem haba kren bad ki nongthoh khubor haka sngi Palei, ula ong ba hadien ba kila ïoh ban pynpra ïaka kynhun jong ki nongkhaii bad pyngngop ïaki kynthei khynnah sha ki kam awria, kila shong ïamir jingmut sani bha la rai ban thaw da ka SIT ban tohkit bniah ban wad bniah laka don ne em ka jingkhaii ïaki khynthei khynnah shabar ka District, Jylla bad bar ri.

Ïa kane ka kynhun tohkit ba kyrpang SIT yn khlieh da Dy. SP Headquarter U Bah MJ Marngar MPS bad ki dkhot ki long u Circle Inspector cum officer Incharge Jowai Police Station u BR Marak, ka OC Women Police SI I Kharpran. U Additional SP BJ Chetri, Dy SP Traffic U Bah Donkupar Moksha bad ka Dy SP Shahana Mukherjee kin pyniaid bad ïarap ïa kane kynhun ban pynsted iaka jingtohkit.

U SP ula ong ba baroh ki kynthei kiba shah pyngngop ki don haduh 24 ngut, 9 ngut la pynthikna ba kidei kiba hapoh 18 snem ka rta. Na kine ki 24 ngut, 4 ngut ki kynthei kila wan mih sha thnad hadien ka jingbuddien ki pulit halor kane ka kam khaii ïaki kynthei haka kam awria.

Ïa baroh la aiti sha ka tnad District Social Welfare ba kin ioh ka jingïasyllok. Ha kaba iadei bad ki 9 ngut pat kiba hap hapoh ka rta 18 snem yn ai ka jingsyllok wat ïa ki kmie ki kpa hashuwa ban aiti sha ki.

Haduh mynta 10 ngut la ïohkem kiba kynthup ïaki longkmie bad ki shynrang kiba suba dei ki nongkhaii ban pynioh kynthei bad ki nongwad kynthei. Kiba donkti ban pynbor bad pyngngop ïaki khynnah haka kam shongkha beaiñ yn pynyngat ïaki hapoh ka kyndon aiñ PoCSO Act.