Da ka kynhun tohkit kyrpang dawa ka KSU & FKJGP halor ka jingiap ki ar ngut ki khynnah skul

Syllad | The Rising MeghalayaMarch 15, 2021

Ka Khasi Students’ Union (KSU), Khliehriat Circle bad ka Federation of Khasi Jaintia and Garo People (FKJGP) East Jaintia Hills District kila dawa na u Superintendent of Police ka District ban pynlong iaka jingtohkit kaba kyrpang halor ka jingshah pyniap ki ar ngut ki khynnah skul ha kine ki 3 bnai.

Ia kane ka dorkhat la leit da ki nongialam ka KSU bad ka FKJGP ba kynthup ia u SN Suchen president KSU Khliehriat circle bad u M Suting president FKJGP haka sngi Nyngkong.

Katkum ka dorkhat la ong “Namar ka jingkiew ka jingshah pyniap bad shah thombor ki kynthei khynnah hapoh ka district, ngi kyntu iaka tnad Pulit ban thung iaka kynhun tohkit kaba kyrpang ban pynsted iaka jingtohkit.”

Kine ki ar seng kila pynkynmaw ruh halor ka jingiap kawei ka khynnah skul ha Ar kilo bad kawei pat ka jingjia shah pyniap bad shah lehbeijot ha u snem bala dep ha u bnai Nohprah 2020 ha East Jaintia Hills District, kaba haduh mynta ym pat ioh kem iano iano halor kane ka jingjia.