Da ka kynhun tohkit thung ka Sorkar; aipor ka MSOA 7 sngi ia u Bah Donny ban pynshai halor ki jingkynnoh

Syllad | The Rising MeghalayaJuly 19, 2024

Ka sorkar jylla lyngba ka tnad Directorate of Sports & Youth Affairs ka la shim ia ka rai ba kan thung da ka kynhun tohkit ka ban kynthup ia saw ngut ki dkhot, kata arngut na Meghalaya State Olympic Association (MSOA) bad arngut na la ka jong ka tnat ban wad ia ki jingshisha baroh halor ka jingkynnoh da ki katto katne ki kmie jong ki khynnah ialehkai Martials Arts pyrshah ia u Bah Donny Ranee.

Ia kane la pyntip da u Secretary ka MSOA u Bah Finely L Pariat haba kren sha ki katto katne ki nongthoh khubor hadien ba la wai ka Executive Meeting jong ka MSOA kaba la long ha ka janmiet 18 tarik Naitung ha ka jaka treikam jong ka ha JN Stadium, Polo, Shillong.

U Bah Finely u la ong ba katkum ka jingujor ba ka MSOA ka la ioh pdiang na ki kmie jong ki khynnah ialehkai, na ka liang jong ka ruh kan thoh da ka shithi pan jingpynshai na u Bah Donny namar jia ryngkhat ba u dei artad uwei na ki dkhot jong ka executive committee ka MSOA. Halor kane ka shithi u Bah Finely u la pynpaw ba la ai por hynniew sngi ia u bah Donny ba un pynshai lut ia baroh ki jingkynnoh pyrshah ia u, kata naduh ba u la ioh pdiang ia ka.

Lah ban pynkynmaw  ba u Bah Donny u ioh rung sha ka Executive Committee ka MSOA hadien ba u mihkhmat ialade na ka Synjuk ialehkai Wushu jong ka jylla.

Nalor katta u bah Finely u la pynpaw ba ka MSOA ka la dep ban thoh sha ka sorkar ba na ka liang ka jong ka kam shym la ithuh satia ia ka Synjuk ialehkai Karate kaba la seng da u bah Donny, pynban kaei kaba u pynpaw hi ka long ba naduh kaba sdang, ba ka MSOA ka  ithuh bad pdiang beit tang ia ka synjuk ka All Meghalaya Karate Do Association (AMKA), kaba la seng ia ka naduh ki por ba mynshwa da u Sensei Stephan Leaong (Bam Kwai ha dwar U Blei).

Hynrei u bah Finely u la kynnoh ba dei ka sorkar (tnat Sports) ka bym shym la sngap bad dei ma ka kaba ai ia katta ka jingtithuh bad mynta ynda haba la poi ha ka khim khait kam banse pat ban pynlong ia ka sorkar lyngba ka tnad Sports ba kan jied ia ki arngut ki dkhot jong ka MSOA ban long kum ki dkhot ka kynhun tohkit kaba la thaw da ka sorkar mynta.

Nalor katta ka MSOA ka la thoh ruh da ka shithi sha u bah Donny namar kum u dkhot jong ka executive committee ka sngew ba bah Donny u la pynjah burom wat ia ka kyrteng ka synjuk hi baroh kawei bad dei hangne ba u sdie lah ban ong ba u la pynap lypa ia u bah Donny ba lada jia ba kam biang ka jingai jubab ka jong u, beit beit u lah wat ban shah weng ruh syndon kum u dkhot ka MSOA, la bynrap u bah Finely.

Hynrei ka jingkylli kaba mih pat mynta ka long hato aiu pat kan jia lada u bah Donny un shah weng noh namar kat kumba lah ban ia kynmaw ba ka jinglong nongialam ka jong u ha kiba bun ki jait jingialehkai martials arts kam shym la shu kut tang ha kawei na artylli ki synjuk, pynban jan man la ki synjuk khamtam lei lei kiba iapait ia pra naduh thymmei (federation) ha ka pyrthei ne hangne ha ka ri, dei u bah Donny uba ju long u nongialam ia kum kine ki synjuk ba iapait hangne ha ka jylla.

Ka jubab na u bah Finely ka long ba hangne lada iaid katkum ka riti treikam ka MSOA, lah ban ong ba u bah Donny da lei lei un nym lah ban bat ne shimti ia kiba bun ki kam ne wat ki bahaiing ha sem ki jong u ruh.

Halor jong kane u bah Finely u la kren shai kdar ba ka ain kam shah ia uno uno President/Secretary ba kin bat ar haduh lai tylli ki kam ia kaba ia kane ka kam ruh u bah Finely u la pynpaw ba ka MSOA ka la pynkhreh ba kan wanrah ia ka jingpynkylla (amend) noh ia ka riti treikam ka jong ka lyngba ka AGM bad kane ka jingpynkylla ka long ruh ba ka iaid lang ryngkat ryngkat bad ka riti treikam jong ka Indian Olympic Association.

Haba iadei bad ka jingkynnoh ki longkmie ia katta ka jingaituh ia ki certificate bad kumjuh ia ka medal sha ki khynnah, u bah Finely hangne u pynpaw ba kane ka kam ka dei kaba juh jia naduh ki Federation ha kaba ju don ki Secretary ki dawa da ka pisa ban ai ia ki certificate, hynrei u la ai pat ia ka nuksa ba kumno ka Athletic Federation ka leh mynta ka long ban lait na kine kiei kiei ka la pyrshang ban ai da katta ka certificate.

Hynrei ia kaei kaba la kynnoh ia u bah Donny u bah Fienly u pynpaw ba um lah ban kren ne ong eiei tip la kadei kaba shisha ne kaba shu thok tangba kiei kiei baroh ki jingkynnoh kin sa mih paw hakhmat ka kynhun tohkit kaba la thung da ka sorkar ban don lang ryngkat u Presdent bad Secretary ka MSOA.