Da ka Last Mile Connectivity Project, ka ban pynioh internet ba 100 Mbps ha Tura

Syllad | The Rising MeghalayaDecember 30, 2023

Ha ka sienjam kaba kongsan ban pyniasoh lyngba ki kor digital, ka sorkar jylla ka pynpaw ka jingkmen ban pynbna halor ka jingseisoh ha ka ban pyntreikam ia ka Tura Link, ka ban pynioh haduh 100 Mbps ka internet connection.

Ha kane ka sienjam ba la lamkhmat da ka Tnat Information Technology & Communication (IT & C), ka Last Mile Connectivity project kadei kaba la pynbit pyjbiang ia ka kot Internet shaduh ki bynta ba kyndong jong ka jylla khnang ban pynthikna ba ki nongshong shnong kin ioh jingmyntoi ban pyniasoh bad ki kor digital bad ka jinglah ban pyntreikam iaka 100 Mbps Link ha Tura ka pyni ia ka jinglah jong ka sorkar jylla ban pynbiang ia ka Internet ha ki thain bapher bapher da kaba weng ia ki jingeh kiba iadei bad ka jinglong jingman ha ki jaka puta.

Na ka liang u Myntri Rangbah ka jylla u Conrad K Sangma haba pynpaw ia ka jingkmen halor kane ka sienjam ula ong, “Ka jinglah ban pynurlong ia kane ka sienjam ha Tura ka dei ka bynta kaba kongsan halor ka jingthmu ban pyniasoh iaka Meghalaya lyngba ki kor teknoloji. Ngi iengskhem ban pynthikna ba baroh ki jingmyntoi ha ka juk digital kadei ban poi sha man la ki nongshong shnong lyngba kane ka Mile Connectivity project.

“Nga pyrto ia ki sienjam ba la shim da ka IT & C Department, Powertel, bad ka  MeECL halor ka jingtrei borbah ban pynurlong ia kane ka jingphohsniew.Na ka liang ka sorkar jylla ka dang khmih shakhmat na ka bynta ban iatreilang ha kaba iadei bad ka jingkyntiew ia ki jingtreikam lyngba ka digital ha ka jylla na ka bynta ka jingbit jingbiang jong ki paidbah nongshong shnong bad na ka bynta ka roi ka par,” ong shuh shuh u CM ka jylla.

Ki kynhun kiba la ia don bynta ban wanrah ia kane  ka jingkylla ki kynthup ia ka Powertel jong ka Power Grid Corporation of India Limited (PGCIL) bad ka Meghalaya Energy Corporation Limited (MeECL) kiba la trei borbah ban pynurlong ia kane ka project.

Na ka liang u Pravin Bakshi, IAS, Commissioner & Secretary, IT & Communications ka jylla ula ong, “Ha ka jingbym don ka kor Internet kaba biang ha Garo Hills kala buh ha ka jingeh kaba khraw bad kala ktah ia kiba bun ki kam ki jam bad ki jingdonkam kiba kyrkieh khamtam eh iaka pule puthi bad ha kaliang ka jingai jingsumar. Ka Tura Link, kaba dei shi bynta jongka Last Mile Connectivity project, mynta kala lah ban rat dyngkhong ia kitei ki jingeh”.