Da ka marathon bad pynshai paidbah pynlong ka CSC, Ri Bhoi ban ialap pyrshah drok

Syllad | The Rising MeghalayaMay 8, 2024

Ka Cinchona Sport Club (CSC) ha ryngkat ka jingkyrshan lang da ka Tnat District Social Welfare Officer, Ri Bhoi District haka 7 tarik Jymmang ka la shim da ka sienjam ban pynlong da ka prokram pynsngewthuh paidbah ha kaba ia dei bad ki jingma na ka jingdih buaid khamtam u drok.

Ka jngpynlong ia kane ka prorkam ka long namar ka jingnang kiew ka jingkyrni bad ka jingnang ngop jong ki samla ha u drok u ba la long shisha u nongshun ba khraw ia ka imlang ka sahlang.

La sdang ia kane ka prokram da kaba pynlong ia ka jingmareh marathon kaba 4-kilometre na Saiden sha ka madan Pahamsyiem ha kaba la wan ban iashim bynta shitrhem da ki samla jong ka thain.

Ha kane ka prokram la wan aijingpynshai halor ka jingma jong u drok da u Bah Meban Tariang uba la mihkhmat na ka Kripa Foundation, ka Kong R. Lyngdoh, District Mental Health Programme na ka Civil Hospital Nongpoh, ki nongialam ka Cinchona Sport Club kaba kynthup ia u Bah Robin Lyngdoh, President, u Bah Anthony Nongkynrieh, Secretary nalor kiwei kiwei ki riew rangbah.

Ha kane ka sngi ka Cinchona Sport Club ka la ioh ruh ban sam ia ki khusnam sha ki nongjop ha ka jingiamareh, kaba kaba kynthup ia ki nongjop ha ka liang ki shynrang, ha kaba u Monas Bongrung u la iohrah ia ka nam ba nyngkong, bud sa u Jemon Makri, bad u Lapynkhraw Thabah, ha ka liang ki kynthei ki nongjop ki kynthup ia ka Filinza Hansepi, ka Barisha khamdeit bad ka Julina Bongrung.