Da ka mela ialap pynsngewthuh ka MGSPHSVA halor ki jingmyntoi ki nongdie madan ha Shillong
Ka Meghalaya & Greater Shillong Progressive Hawkers and Street Vendors Association (MGSPHSVA) ha ryngkat ka jingkyrshan n bad jingiatreilang ka tnat Urban, MUDA bad Municipal ka Sorkar Meghalaya, ryngkat bad 13 tylli ki bank ka la pynlong ia ka mela kaba shi sngi halor ka scheme jong ka Sorkar India, kaba la tip kum ka PM Street Vendor”s AtmaNirbhar Nidhi, na ka bynta ki nongdie madan. Bad kane ka mela ka la long ha U Soso Tham Auditorium, IGP Shillong ha ka 04 tarik Rymphang 2021.
Ka PM Street Vendor”s Atma Nirbhar Nidhi ka dei ka scheme ba ka Sorkar India ka la pynbna tang na ka bynta ki nongdie madan. Kane ka scheme ka dei ka ram ba ka Sorkar India ka ai sha ki nongdie madan lyngba ki Bank.
Kane ka scheme ka dei kaba ka Sorkar India ka la mang kyrpang na ka bynta ban kyrshan ia ka jingim bad ka kamai kajih jong ki nongdie madan ha kane ka por ba lynshop ka khlam Covid19. Kumba ngi tip ba ka khlam covid 19 ka la ktah jur ia ka kamai kajih ki briew kiba duk kum ki nongbylla sngi bad khamtam eh ki nongdie madan. Kumta ban kyrshan ia ka jingim bad jingkamai jong ki nongdie madan ka Sorkar India ka la pynbna bad mang kyrpang ia ka ram lyngba ki Bank ba ki nongdie madan ki lah ban shim ban kyrshan bad bynrap ia ka kamai kajih jong ki.
Kumba 500 ngut ki nongdie madan ki la wan sha katei ka mela bad la jan 50 na kitei kiba la pyndap bad thep ia ki form na ka bynta ban ioh ia katei ka scheme. Ki heh Sorkar, ba kynthup ia u Director ka MUDA, ki State bad City Mission Mangers jong ka MUDA ki la iadon ryngkat ban ialap bad pynshai halor ka scheme. Kaba kham kongsan eh ka long ka jingdon jong ki ophisar bad nongmihkhmat jong ki Bank bapher bapher, kum ka State Bank of India, Meghalaya Rural Bank bad kiwei. Kine ki nongmihkhmat na ki Bank ki la batai kham bniah halor ka scheme bad ki jingdonkam kum ki kot ki sla bad kiwei ba ki nongdie madan ki dei ban pynbiang ha ka por ba ki apply ia katei ka scheme.
Kum ka jingbteng ia kane ka mela ka tnat Urban ka Sorkar Jylla ka la pynbeit ban pynlong ia ka jingpynrung kyrteng bad thep application phorm ha ka ophis jong ka tnat Urban kaba don ha Raitong Building, IGP Shillong. Kane ka jingthep kyrteng kan sdang naduh ka 5 tarik haduh ka 12 tarik Rymphang 2021 man la ka sngi ha ka por long trei, kata naduh ka por 10 baje mynstep.
Kumta ka Seng ki nongdie madan, ka MGSPHSVA ryngkat ka tnat Urban ka khot ka wer ia ki nongdie madan ban wan mih sha ka ophis jong ka tnat Urban.
Ia ki jingtip ba kham bniah phi lah ban leit sha ka ophis ka tnat Urban bad ki dkhot jong ka Seng MGSPHSVA ki lah ban iakynduh ia ki nongmihkhmat jong ki unit bapher lane ki nongkitjkam jong ka Seng.
Lyngkot eh ki jingtip ba kongsan shaphang ka scheme:
Ka PM Street Vendor”s AtmaNirbhar Nidhi ka dei ka scheme ha ka dur jong ka ram ba ka Sorkar India ka ai tang sha ki nongdie madan lyngba ki Bank.
Kane ka ram ka long haduh Rs.10000/ (shiphew hajar) tyngka bad ki nongshim ia kane ka ram ki lah ban siew dep hapoh shi snem bad lah ruh ban siew pyndep ia ka ram ha shuwa ban kut ka shi snem.
Ka sut ba ki dei ban siew ka long ha ka dor 9.90% bad ka Sorkar kan ai jingiarap ha kaba siew ia ka sut haduh 7% na ka bynta kito ki nongshim ram kiba siew thikna ia ka ram.
Ym donkam ban buh bynda haba shim ia kane ka ram.
Ki nongshim ram kin ioh shisien ioh baroh shiphew hajar tyngka ha kajuh ka por.
Ka Sorkar ka la pyniasnoh ia kane ka scheme sa bad kiwei pat ki hynniew tylli ki jingmyntoi kiba ki nongdie madan ki lah ban ioh.
Ka Bank ka lah ruh ban iai kyrshan bad ai ki ram kiba kham heh ia kito ki nongshim ram kiba siew thikna bad kiba pyndep ban siew ha ka por ba la buh.
Ki kot ki sla ba donkam ban ai ryngkat bad ka phorm ki long kumne:
a. Ka Epic thep vote ba la dep xerox
b. Ka bank pass book ba la dep xerox
k. Ka Letter of recommendation na ka tnat Urban/Municipal ka Sorkar Jylla.
d. Ar tylli ki dur pass port size.
e. Ia ki phorm lah ban ioh na ka ophis ka tnat urban/municipal
g. Ki nongshim ram ki dei ban ai ka jingtip kaba shai bad thikna halor ka jaka ba ki shong bad u mobile phone number uba dei u jong ki hi.
Facebook
Instagram
Youtube
Twitter
Leave a Reply