Da ka mela nongrep pynlong ka NHB ha Shangpung

Syllad | The Rising MeghalayaJune 30, 2022

Ka National Horticulture Board (NHB) kaba hap haka Ministry of Agriculture and Farmers Welfare jong ka sorkar pdeng ryngkat ka jingïatrelang ka Meghalaya State Agriculture Marketing Board (MSAMB) bad ka Directorate of Horticulture, Meghalaya ki la pynlong iaka Cluster Development Programme Krishi Mela ne ka mela nongrep ban pynsngewthuh paidbah shaphang ka kam rep kam riang ban pyniaid iew iaki mar rep.

Ia kane ka mela nongrep la pynlong haka sngi Balang ha Multi Facility Hall ka Shangpung Moolibang West Jaintia Hills District ha kaba u MDC ka thaiñ u Ma J Treilang Suchiang kum u kongsan ula plie paidbah ïaka Mela.

U Manish Shah NHB ula batai shaphang ka Cluster Development Programme (CDP) kadei ka project jong ka sorkar pdeng kaba thmu ban kyntiew bad ai jingkyrshan ïaki kynhun jong ki nongrep haki lai tylli ki bynta kynthup naduh shwa ban thung bad kumno ban thung ïa u jingthung, kumno ban pynwandur ban sumar ïaki jingthung hadien ba la dep ban kheit ïaki kumno ban pynwandur ïaki jingthung khnang ban ïoh ïaka dor kaba biang kaba kham bit bad ban pynlah ïaki jingthung ban ïoh ka lad ban khaiï bad shalan sha kiwei ki bynta.

Ula ïathuh ba ïa kane ka project la plie nyngkong ïaka ha nongbah Delhi da u Myntri ka tnad Agriculture ka sorkar India. Kane ka project yn leh ïaka haki 55 tylli ki cluster jong ka ri India.

Shuh shuh haka jingpyntreikam kaba nyngkong ne 1st pilot phase, ula ïathuh ba la pyntreikam nyngkong haki 12 tylli ki cluster haki 11 tylli ki Jylla bad napdeng ki 12 tylli ki cluster ha Jylla Meghalaya la jied ïaka West Jaintia Hills District na bynta u shynrai Lakadong.

Ula ong lyngba kane ka project ki nongrep ha baroh kawei ka ri India kin ïoh jingïarap haduh 3 lak ngut lyngba ka National Horticulture Board bad ka jingïarap pisa ka long kumba 12 hajar klur tyngka khnang ba kin lah ban pynkiew ïaka rep ka riang jong ki haki lai bynta.

Katba ha West Jaintia kane ka project kan ai jingïarap haduh 13 hajar ngut ki nongrep, ka jingheh jong ka jaka (area) ban thung ka long 2 hajar hecter katba ka jingmih la buh thong haduh 13 hajar metric ton, la ong u Shah.

“Nga sngew kmen ban ïohi ba ki nongrep jong ngi ki la nang ban rep ha kine ki sngi da kaba rep ïaki jingthung kiba ïaid dor hapoh ki ïew ki hat khamtam u shynrai uba la bna haka pyrthei baroh kawei bad kiwei kiwei de ki jhur ki jhep”, la ong u Ma J Treilang Suchiang.

Ha kajuh ka por ula kyntu ïaki nongrep ban trei shitom haka kam rep kam riang namar ka long u bud lum jong ka jylla baroh kawei.

Ula kyntu ruh ïaka tnad ba kamdei ban shu pynshlur ïaki nongrep tang ban thung khlem da ai ki lad jingïarap ïaki nongrep, namar kajuk kaba mynta ki nongrep ki donkam ïaki kor mashin, ki synbai bad kiwei kiwei ki lad jingïarap.

Hadien ka jingïalang u J. Treilang Suchiang ula plie ïaki 6 tylli dukan die shynrai kynthup ka West Jaintia Hills Farmers Producer Company Ltd Sanaro, Ïeintylli VO Madankynsaw, Chi Ïung Spices Cooperative Society Mowtyrshiah, Synroplang Thadmuthlong A, Life Spices Processing Cooperative Society Ltd Laskeiñ bad Ïeinskem Spice Producer Industrial Cooperative Society Mulieh.

Hashwa kane la ïoh ka jingkren pdiang burom na u Ma EMH Passah, District Horticulture Officer, West Jaintia Hills District haka jingdonlang ki spah ngut ki nongrep.