Da ka Mini Secretariat haka jaka North Jowai Division yn ioh ka Jowai

Syllad | The Rising MeghalayaNovember 6, 2020

Ka Jowai ka sorbah jong ka West Jaintia Hills District ka lah ban ioh iaka Mini Secretariat ha Jowai.

Ia kane la iathuh mynta ka sngi da u MLA ka Jowai u ma Wailadmiki Shylla haka jingialang kaba long hapdeng ki Waheh Shnong Urban Jowai kiba iakynduh ia u halor ban pyrshah iaka jingpynkynriah iaka North Jowai Division na Jowai sha Shangpung ha Circuit Jowai.

“Ki Waheh Shnong Urban Jowai ha kane ka jingiakynduh bad u MLA kila pynpaw iaka jingpyrshah ia kane ka jingpynkynriah iaka North Jowai Division bad dawa na u MLA ban pyndam iaka jingpynkynriah, hynrei na kaliang u MLA ula ong ba ym lah ban leh eiei bad haka jaka jong ka North Jowai Division yn wanrah da ka Mini Secretariat ha Jowai,” la ong u ma Alan Niangti president Synjuk Waheh Shnong Urban Jowai.

“Ngim pdiang ia kane ka jingpynbeit ka sorkar jylla bad lada ngin hap ban mih sha surok ruh ngi mih ban pyrshah iaka jingpynkynriah iaka North Jowai Division na Jowai sha Shangpung,” la ong u ma Alan namar ba ka jingrah ia kane ka ophis kan nym wanrah jingmyntoi, hynrei ka jingthud iaka tnad PWD khamtam haba iadei bad ki kam jong kane ka tnad bad ka ka ophis u DC, ka Treasury bad ki Bank.

Ka PWD North Jowai Division, ka jingdon jong ka ha Jowai ka pynsuk ia baroh ki nongshong shnong jong ka Rilum Jaintia namar ba ka peit ym tang iaka Laskein Block hynrei wat iaki shnong kiba hap haka Thadlaskein Block.

U MLA Jowai ma Wailadmiki Shylla, ula ong ba ym lah ban leh eiei halor kane ka jingpynkynriah iaka North Jowai Division sha Shangpung Sub-Division kaba la kyntiew kyrdan noh sha Shangpung Division namar ba 95 percent ki surok ki dei kiba hap hapoh ka jingpeit ka Shangpung Sub Division.

“Nga la iathuh iaki waheh shnong ba kam don jingmut ka jingpyrshah namar ba sorkar ka don jingthmu ban wanrah da ka Mini Secretariat haka jaka ka North Jowai Division bad lashai ka sngi u Myntri Rangbah ka Jylla u Conrad K Sangma un wan jurip iaka jaka khnang ban ioh ban pyniaid shakhmat ia kane ka kam,” la ong u ma Wailadmiki Shylla.

Ula ong shuh shuh ba “Iaka DC ophis bad kiwei ki tnad sorkar kin iadonlang shi jaka ha katei ka jaka bad ban pynkylluid iaka Iawmusiang,” la ong u Ma Wailadmiki Shylla bad ula ong ruh iaka synjuk waheh shnong Jowai ban ai iaki daw kiba biang halor ka jingpyrshah jong ki ban rah iaka North Jowai Division sha Shangpung.

Ia kane ka Mini Secretariat yn tei ruh ha Tura, kaba dei kawei na ki district kaba rim ha rilum Garo.